-కేసీఆర్ కుటుంబమే లిక్కర్ మాఫియా

-ఎమ్మెల్యే నాగరాజు 

హైదరాబాద్, అక్టోబర్ 23 (విజయక్రాంతి): బీఆర్‌ఎస్ నేత కేటీఆర్‌కు లిక్కర్ గురించి మాట్లాడే హక్కు లేదని కాంగ్రెస్ ఎమ్మెల్యే నాగరాజు అన్నారు. కేసీఆర్ కుటుంబం అంటేనే లిక్కర్ మాఫియా అని ఆయన ఆరోపించారు. దేశంలో తెలంగాణకు విలువ లేకుండా చేసిన పాపం కేసీఆర్ కుటుంబానిదేనని ఆయన విమర్శించారు. గురువారం ఆయన గాంధీభవన్‌లో మీడియాతో మాట్లాడుతూ టెండర్లు కాకుండానే లిక్కర్ కుంభకోణం జరిగిందని కేటీఆర్ ఇష్టమొచ్చినట్లు మాట్లాడుతున్నారని ఆయన మండిపడ్డారు.

ఆధారాలు ఉంటే చూపించాలి.. కానీ అడ్డగోలుగా ఆరోపణలు చేయడం సరికాదు అని ఎమ్మెల్యే నాగరాజు హితవు పలికారు. టానిక్ పేరుతో కేటీఆర్, సంతోష్ రావు కలిసి మద్యం వ్యాపారం చేయలేదా.. ? అని ఆయన ప్రశ్నించారు. కేటీఆర్ మాటలు వింటుంటే దయ్యాలు వేదాలు వల్లించినట్లే ఉందని, ‘టానిక్ పేరుతో మీరు ఎంత దోచుకున్నారో’ నిరూపిస్తామన్నారు. దీనిపై జూబ్లీహిల్స్ పెద్దమ్మ గుడిలో ప్రమాణం చేయడానికి కూడా తాము సిద్ధమన్నారు. ‘మీ రాజకీయాల్లోకి సీఎం రేవంత్‌రెడ్డి అల్లుడిని లాగడం సిగ్గుచేటు’ అని, మరోసారి ఇష్టమున్నట్టు మాట్లాడితే తగిన చర్యలు ఉంటాయని ఎమ్మెల్యే హెచ్చరించారు. మద్యం టెండర్లలో ఎలాంటి అక్రమాలూ జరుగలేదన్నారు.