హైదరాబాద్: జనగామ జిల్లా సామాజిక కార్యకర్త గాదె ఇన్నయ్య ఇంట్లో ఎన్ఐఏ సోదాలు చేస్తోంది. జాఫర్‌గఢ్ మండలం టీబీ తండాలో మంగళవారం సోదాలు కొనసాగుతున్నాయని అధికారులు తెలిపారు. గాదె ఇన్నయ్య నిర్వహిస్తున్న అనాథాశ్రమంలో ఎన్ఐఏ సోదాలు చేస్తోంది. నిషేధిత సీపీఐ మావోయిస్టు సంస్థతో సంబంధాలు ఉన్నాయనే ఆరోపణలు, ప్రభుత్వ వ్యతిరేక భావాలను రెచ్చగొడుతున్నారనే కారణాలతో జాతీయ దర్యాప్తు సంస్థ మాజీ మావోయిస్టు నాయకుడు, సామాజిక కార్యకర్త అయిన 64 ఏళ్ల గాదె ఇన్నారెడ్డి అలియాస్ గాదె ఇన్నయ్యను అరెస్టు చేసింది. ప్రస్తుతం గాదె ఇన్నయ్య చంచల్ గూడ జైలులో ఉన్నాడు. ఇన్నయ్యపై ఆర్‌సి-04/2025/ఎన్‌ఐఏ/హైద్ నంబర్‌తో కేసు నమోదు చేయబడింది. అతనిపై భారతీయ న్యాయ సంహిత (బీఎన్ఎస్)లోని సెక్షన్ 132, చట్టవిరుద్ధ కార్యకలాపాల (నివారణ) చట్టం (యూఏపీఏ), 1967లోని సెక్షన్లు 13,39 కింద అభియోగాలు మోపబడ్డాయి.

అధికారుల ప్రకారం, ఇన్నయ్య ప్రసంగాలు మావోయిస్టు కార్యకలాపాలను ప్రోత్సహించే ఉద్దేశ్యంతో ఉన్నాయని, భారత ప్రభుత్వం, భద్రతా దళాలపై సాయుధ విప్లవంలో పాల్గొనమని ఆయన ప్రేక్షకులను రెచ్చగొట్టారని ఆరోపణలు ఉన్నాయి. మరణించిన మావోయిస్టు నాయకుడు కట్టా రామచంద్రారెడ్డి అలియాస్ వికల్ప్ స్మారక సభలో ఆయన రెచ్చగొట్టే ప్రసంగాలు చేసినట్లు తమ వద్ద వీడియో సాక్ష్యాలు ఉన్నాయని ఆ ఏజెన్సీ పేర్కొంది. ఆరోపించిన వ్యాఖ్యలు చేసిన సమావేశంలో సుమారు 150 నుండి 200 మంది ప్రజలు ఉన్నారని అధికారులు తెలిపారు.