టియాంజిన్, చైనా: చైనాలోని టియాంజిన్‌(Tianjin)లో చైనా అధ్యక్షుడు జి జిన్‌పింగ్‌తో ప్రధానమంత్రి నరేంద్ర మోదీ(PM Narendra Modi) ద్వైపాక్షిక సమావేశం నిర్వహించారు. ఈ సమావేశంలో మోదీ మాట్లాడుతూ, "గత సంవత్సరం కజాన్‌ లో తాము చాలా ఫలవంతమైన చర్చలు జరిపామని, ఇది మా సంబంధాలకు సానుకూల దిశానిర్దేశం చేసిందన్నారు. సరిహద్దులో తెగతెంపుల తర్వాత శాంతి, స్థిరత్వ వాతావరణం ఏర్పడిందని.. సరిహద్దు నిర్వహణకు సంబంధించి మా ప్రత్యేక ప్రతినిధుల మధ్య ఒక ఒప్పందం కుదిరిందని అన్నారు. కైలాష్ మానసరోవర్ యాత్ర తిరిగి ప్రారంభమైందని.. రెండు దేశాల మధ్య ప్రత్యక్ష విమానాలు కూడా తిరిగి ప్రారంభించబడుతున్నాయన్నారు. రెండు దేశాలకు చెందిన 2.8 బిలియన్ల ప్రజల ప్రయోజనాలు మా సహకారంతో ముడిపడి ఉన్నాయని, ఇది మొత్తం మానవాళి సంక్షేమానికి కూడా మార్గం సుగమం చేస్తుందని మోదీ పేర్కొన్నారు. పరస్పర విశ్వాసం, గౌరవం, సున్నితత్వం ఆధారంగా మా సంబంధాలను ముందుకు తీసుకెళ్లడానికి తాము కట్టుబడి ఉన్నామని తెలిపారు. "చైనా SCOకి విజయవంతంగా అధ్యక్షత వహించినందుకు తాను అభినందిస్తున్నానని, చైనాను సందర్శించడానికి ఆహ్వానించినందుకు, అలాగే ఈరోజు సమావేశానికి ధన్యవాదాలు" అని జిన్‌పింగ్‌తో అన్నారు. 

చైనా అధ్యక్షుడు జిన్‌పింగ్(Chinese President Xi Jinping) మాట్లాడుతూ... "చైనా, భారత్ తూర్పున రెండు పురాతన నాగరికతలు. మనం ప్రపంచంలోనే రెండు అత్యధిక జనాభా కలిగిన దేశాలు, మనం గ్లోబల్ సౌత్‌లో కూడా ముఖ్యమైన సభ్యులు. మన రెండు ప్రజల శ్రేయస్సును మెరుగుపరచడం, అభివృద్ధి చెందుతున్న దేశాల సంఘీభావం, పునరుజ్జీవనాన్ని ప్రోత్సహించడం, మానవ సమాజ పురోగతిని ప్రోత్సహించడం వంటి చారిత్రక బాధ్యతను మనమిద్దరం భుజాన వేసుకున్నాము. మంచి పొరుగు, స్నేహపూర్వక సంబంధాలను కలిగి ఉన్న స్నేహితులుగా, ఒకరికొకరు విజయానికి దోహదపడే భాగస్వాములుగా ఉండటం, డ్రాగన్ మరియు ఏనుగు కలిసి రావడం రెండు దేశాలకు సరైన ఎంపిక" అని తెలిపారు. ఈసారి టియాంజిన్‌ లో మోదీని మళ్ళీ కలవడం తనకు చాలా ఆనందంగా ఉందని.. గత సంవత్సరం మోదీ, తాను కజాన్‌లో విజయవంతమైన సమావేశాన్ని నిర్వహించామని.. చైనా-భారత్ సంబంధం కొత్తగా తిరిగి ప్రారంభమైందని అన్నారు. తాము అంగీకరించిన ముఖ్యమైన ఏకాభిప్రాయాన్ని ఇరుపక్షాలు పరోక్షంగా అమలు చేశాయని, ద్వైపాక్షిక మార్పిడులు.. సహకారం కొత్త పురోగతిని సాధించాయని జిన్‌పింగ్ పేర్కొన్నారు.