సిద్దిపేట క్రైమ్: వాతావరణ శాఖ అంచనా ప్రకారం సిద్దిపేట ప్రాంతంలో రాబోయే మూడు రోజులు(ఆగస్టు 13, 14, 15) అతి భారీ నుంచి భారీ వర్షాలు కురవనున్నాయి. వర్షాల వల్ల రోడ్లపై జారుడు పరిస్థితులు, నీటి నిల్వ, రోడ్డు దెబ్బతినడం వంటి ప్రమాదాలు ఏర్పడే అవకాశం ఉంది. కాబట్టి వాహనదారులు సురక్షితంగా ప్రయాణించడానికి సిద్దిపేట ట్రాఫిక్ ఏసీపీ సుమన్ కుమార్(Traffic ACP Suman Kumar) పలు సూచనలు పాటించాలని కోరారు. 

జాగ్రత్తగా వాహనం నడపండి

వర్షంలో రోడ్లు జారుడుగా ఉంటాయి. వేగం తగ్గించి, ముందు వాహనానికి సురక్షిత దూరం పాటించండి. అనవసరంగా ఓవర్‌టేక్ చేయవద్దు.  

ప్రమాదాలు జరిగితే తక్షణం తెలియజేయండి

రోడ్డుపై చెట్లు పడిపోవడం, రోడ్డు ధ్వంసం అవ్వడం, వాగులు,వంకలు పొంగిపొర్లడం లాంటి సంఘటనలు జరిగితే, వెంటనే ట్రాఫిక్ కంట్రోల్ రూమ్‌(8712667100)కు సమాచారం ఇవ్వండి .   

నీటి నిల్వ ఉన్న ప్రదేశాలను జాగ్రత్తగా దాటండి 

రోడ్డుపై నీరు నిలిచి ఉంటే, మ్యాన్‌హోల్స్ లేదా గుంతలు ఉండే ప్రమాదం ఉంది. అలాంటి ప్రాంతాల్లో వాహనం నడపడానికి ప్రయత్నించవద్దు. ప్రత్యామ్నాయ మార్గం ఎంచుకోండి.  

చీకట్లో ప్రయాణం మానుకోండి 

రాత్రి సమయంలో అత్యవసరం అయితే తప్ప  ప్రయాణాలను చేయొద్దు.  

వాతావరణ సూచనలను తెలుసుకోండి 

ఎప్పటికప్పుడు వాతావరణ సూచనలు తెలుసుకోండి. అతి భారీ వర్షాలు ఉంటే దూర ప్రయాణాలను వాయిదా వేయండి. 

వాహనం కండిషన్ సరిచూసుకోండి 

వర్షంలో స్పష్టంగా చూడడానికి వైపర్లను శుభ్రం చేసుకోండి. టైర్లు, బ్రేకులు, హెడ్‌లైట్లు, ఫాగ్ లైట్లు సరిగ్గా పనిచేస్తున్నాయో తనిఖీ చేయండి.  

నీటిలో ఆగిపోకండి 

రోడ్డుపై నీరు నిలిచి ఉంటే, వాహనాన్ని ఆ నీటిలో నడపడానికి ప్రయత్నించవద్దు.  

సీట్ బెల్ట్, హెల్మెట్ ధరించండి 

కారులో ప్రయాణిస్తున్నప్పుడు సీట్ బెల్ట్ తప్పనిసరిగా ధరించండి. టూ వీలర్ వాహనదారులు ఐఎస్ఐ మార్క్ ఉన్న హెల్మెట్ ధరించండి.  

మొబైల్ ఫోన్ వాడొద్దు 

డ్రైవింగ్ సమయంలో మొబైల్ ఫోన్ వాడవద్దు. వర్షంలో ఏకాగ్రత చాలా ముఖ్యం. టూవీలర్ వాహనదారులు రెయిన్‌కోట్, వాటర్‌ప్రూఫ్ షూస్ వంటివి ఉపయోగించండి.