న్యూఢిల్లీ: 12 రాష్ట్రాలు, కేంద్రపాలిత ప్రాంతాలలో ఓటర్ల జాబితాలను నవీకరించడమే లక్ష్యంగా భారత ఎన్నికల సంఘం దేశవ్యాప్తంగా స్పెషల్ ఇంటెన్సివ్ రివిజన్ (SIR) రెండవ దశను ప్రారంభించనున్నట్లు సోమవారం ఎన్నికల ప్రధాన కమిషనర్ జ్ఞానేష్ కుమార్ ప్రకటించారు. ఓటరు జాబితా ప్రత్యేక సమగ్ర సవరణ (Special Intensive Revision)లో భాగంగా రెండోదశ ప్రక్రియ మంగళవారం ప్రారంభం కానుందన్నారు. 

గత రెండు దశాబ్దాలలో భారతదేశంలో ఇది మొట్టమొదటి ఇంటెన్సివ్ ఓటర్ల జాబితా సవరణ అవుతుంది. ఓటర్ల రికార్డు ఖచ్చితత్వం పెరిగేలా చూసేందుకు ఎన్నికల సంఘం ఈ కసరత్తు చేపట్టబడింది. సుప్రీంకోర్టు ఆదేశాలను అనుసరించి జనవరి 31, 2026 నాటికి స్థానిక సంస్థల ఎన్నికలు పూర్తి కానున్నందున, మంచుతో కప్పబడిన రాష్ట్రాలు, కేంద్రపాలిత ప్రాంతాలైన జమ్మూ కాశ్మీర్, హిమాచల్ ప్రదేశ్, ఉత్తరాఖండ్, సిక్కిం మరియు లడఖ్‌లతో పాటు, మొదటి దశ సవరణలో మహారాష్ట్రను మినహాయించనున్నట్లు వర్గాలు తెలిపాయి. 

రేపట్నుంచి అండమాన్- నికోబార్ దీవులు, గోవా, పుదుచ్చేరి, ఛత్తీస్‌గఢ్, గుజరాత్, కేరళ, మధ్యప్రదేశ్, ఉత్తరప్రదేశ్, రాజస్థాన్, పశ్చిమ బెంగాల్, తమిళనాడు, లక్షద్వీప్ (9 రాష్ట్రాలు, 3 కేంద్రపాలిత ప్రాంతాల)లో మంగళవారం నుండి ఓటర్ల జాబితాల ప్రత్యేక ఇంటెన్సివ్ రివిజన్ (SIR) రెండవ దశ ప్రారంభమవుతుంది.  వచ్చే ఏడాది ఫిబ్రవరి 7వ తేదీ నుంచి తుదిదశ ఓటర్ల జాబితా ప్రకటన జరుతుందని సీఈసీ వెల్లడించారు.

12 రాష్ట్రాలు, కేంద్రపాలిత ప్రాంతాలలో రెండవ దశ ఎస్ఐఆర్ ను అమలు చేయబోతున్నామని ప్రధాన ఎన్నికల కమిషనర్ జ్ఞానేష్ కుమార్ చెప్పారు. అయితే, ఈ చొరవ ఇప్పటికే రాజకీయంగా దుమారం రేపింది. ఈసీ ప్రకటనకు ముందే, తమిళనాడు ముఖ్యమంత్రి ఎంకే స్టాలిన్ రాష్ట్ర అసెంబ్లీ ఎన్నికలకు ముందే ఓటర్ల జాబితా నుండి పేర్లను తొలగించడానికి బీజేపీ కుట్ర పన్నుతోందని ఆరోపించారు.