ఒంటరి పాట

ఎక్కడో కొమ్మచాటున కూస్తున్న 

కోకిల పాటను

తనివితీరా విందామని చెట్టువైపు చూశాను

ఒంటరి పాటను ఆలపిస్తున్న వాసంతము

గతకాలాన్ని వినిపిస్తూ జ్ఞాపకాలని 

పరిచయం చేస్తుంది

సాలెగూళ్లలా అల్లుకున్న 

బంధాలన్నీ పటాపంచలై

ఒంటరి బతుకుపాటని 

పాడుతున్న జీవితానికి

వనప్రియ గడిచిన కాలాన్ని 

పాఠముల్లే వల్లె వేస్తుంది!

మాయదారి మనుషుల 

మర్మాన్ని చెవిన చేరుస్తుంది !!

నదీజలమై ఎండిన ఎన్నో 

గొంతులను తడిపిన

చేతులు ఇప్పుడు ఒకరి సహాయం 

కోసం చూస్తున్నాయి

కాలువలా ప్రవాహమై పారిన జీవనం

ఎండిపోయిన వాగులా మారింది

ఒంటరిపాటనై బతుకు పాటను 

ఆలపిస్తున్నాను

ఏ గొంతు తోడుగా నిలవడం లేదు

ఏ చేతులూ అలసిన గొంతును 

ఓదార్చడం లేదు!

నాతో నేను ఏకాంతంగా బతుకు పాటను

ఆలపిస్తుంటే గాంధర్వము 

నాకు తోడై నిలిచి.. దుఃఖంతో

నిండిన గుండె దాహాన్ని తీరుస్తుంది.

చీకటినిండిన ఎదలో 

ధైర్యమనే మిణుగురులావెలగమంటుంది.

మాయ మనుషుల 

మర్మం తెలుసుకొని జాగ్రత్తగా

మెదులమంటుంది!!