బీజాపూర్: ఛత్తీస్‌గఢ్‌లో వేర్వేరు ఘటనల్లో 14 మంది మావోయిస్టులు మృతి చెందారు. బీజాపూర్ జిల్లాలో శనివారం తెల్లవారుజామున భద్రతా సిబ్బందితో జరిగిన ఎదురుకాల్పుల్లో ఇద్దరు నక్సలైట్లు మరణించారని పోలీసులు తెలిపారు. జిల్లాలోని దక్షిణ ప్రాంతంలోని ఒక అటవీ ప్రాంతంలో ఉదయం 5 గంటల ప్రాంతంలో ఎన్ కౌంటర్ జరిగినట్లు ఒక అధికారి తెలిపారు. సుక్మా జిల్లాలో జరిగిన ఎదురుకాల్పుల్లో 12 మంది మావోయిస్టులు మృతి చెందారు. ఈ భారీ ఎన్ కౌంటర్ లో కుంటా ఏరియా కమిటీ కార్యదర్శి మంగడు మృతి చెందినట్లు అధికారులు వెల్లడించారు. దక్షిణ బీజాపూర్ అటవీ ప్రాంతంలో మావోయిస్టు కార్యకర్తలు ఉన్నారనే నిర్దిష్ట సమాచారం ఆధారంగా, జిల్లా రిజర్వ్ గార్డ్ (District Reserve Guard) సిబ్బందితో కూడిన ఒక బృందం గాలింపు చర్యను ప్రారంభించింది. శనివారం ఉదయం నుంచి భద్రతా బలగాలకు, మావోయిస్టులకు మధ్య అడపాదడపా కాల్పులు జరుగుతున్నాయి. ఎన్‌కౌంటర్ జరిగిన ప్రదేశంలో జరిపిన గాలింపు చర్యల సందర్భంగా ఇప్పటివరకు ఇద్దరు మావోయిస్టుల మృతదేహాలను స్వాధీనం చేసుకున్నాం” అని బస్తర్ పోలీసులు విడుదల చేసిన ప్రకటనలో తెలిపారు.

గాలింపు చర్యలు కొనసాగుతున్నందున, క్షేత్రస్థాయిలో మావోయిస్టు వ్యతిరేక పోరాటంలో నిమగ్నమైన సిబ్బంది భద్రతా కారణాల దృష్ట్యా తదుపరి కార్యాచరణ వివరాలు వెల్లడించలేదు. ఈ కాల్పుల ఘటనలో ఏ భద్రతా సిబ్బందికి గాయాలైనట్లు ఎలాంటి నివేదిక అందలేదు. ఘటనాస్థలి నుంచి ఏకే -47, ఇన్సాస్ రైఫిల్స్, ఆయుధాలు స్వాధీనం చేసుకున్నారు.  జనవరి 1, 2024 నుండి ఇప్పటివరకు బీజాపూర్ జిల్లాలో 824 మంది నక్సలైట్లు ప్రధాన స్రవంతిలో చేరారు. 1079 మంది మావోయిస్టులు అరెస్టు అయ్యారు. వేర్వేరు ఎన్‌కౌంటర్లలో 222 మంది మావోయిస్టులు హతమయ్యారు. బీజాపూర్ బస్తర్ డివిజన్‌లోని మావోయిస్టుల ప్రభావం ఉన్న జిల్లాలలో ఒకటిగా ఉంది. దీనిని తరచుగా దక్షిణ ఛత్తీస్‌గఢ్‌లోని వామపక్ష తీవ్రవాదుల కేంద్రంగా పేర్కొంటారు. 2026 మార్చి 31 నాటికి దేశం మావోయిస్టు రహితంగా మారుతుందని కేంద్ర హోంమంత్రి అమిత్ షా ప్రకటించిన విషయం తెలిసిందే.