స్థానిక పోరుకు ఆశావహుల ఎదురుచూపులు!
- ఎంపీటీసీ, జెడ్పీటీసీ ఎన్నికలపై ఆసక్తి..
- టికెట్ల వేటలో నాయకులు..
- గ్రామాల్లో మొదలైన రాజకీయ సందడి!
కౌటాల, నవంబర్ 3 (విజయక్రాంతి): స్థానిక సంస్థల ఎన్నికల(Local body elections) కోసం ఆశావహులు ఆసక్తిగా ఎదురుచూస్తున్నారు. ఎంపీటీసీ, జెడ్పీటీసీ ఎన్నికల షెడ్యూల్(MPTC and ZPTC election schedule) ఎప్పుడు వెలువడుతుందోనని రాజకీయ నాయకులు(Political leaders), పోటీ చేయాలనుకుంటున్న అభ్యర్థులు ఉత్కంఠగా ఎదురుచూస్తున్నారు. ఎన్నికల నిర్వహణపై అధికారిక ప్రకటన వెలువడకపోయినా గ్రామీణ ప్రాంతాల్లో మాత్రం రాజకీయ సందడి మొదలైంది. ఓటర్ల జాబితా, గణాంకాలు సిద్ధం కావడంతో ఆశావహులు తమ రాజకీయ భవిష్యత్తుపై లెక్కలు వేసుకుంటున్నారు.
పల్లెపోరుపై పార్టీల దృష్టి!
స్థానిక సంస్థల ఎన్నికల నేపథ్యంలో ప్రధాన రాజకీయ పార్టీల నాయకులు గ్రామాలపై దృష్టి సారిస్తున్నారు. ఎంపీటీసీ, జెడ్పీటీసీ స్థానాల్లో పోటీ చేసేందుకు ఆసక్తి చూపుతున్న నాయకులు తమ రాజకీయ ప్రయత్నాలను ముమ్మరం చేస్తున్నారు. పార్టీ తరఫున అవకాశం దక్కించుకునేందుకు ముఖ్య నాయకులతో సంప్రదింపులు జరుపుతున్నారు. మరోవైపు కొత్తగా రాజకీయాల్లోకి రావాలనుకుంటున్న యువత కూడా స్థానిక ఎన్నికలపై ఆసక్తి చూపుతోంది. ఎన్నికల షెడ్యూల్ వెలువడకముందే గ్రామాల్లో రాజకీయ చర్చలు మొదలయ్యాయి.
కౌటాలలో 27,304 మంది ఓటర్లు
కౌటాల మండలంలో మొత్తం 27,304 మంది ఓటర్లు ఉండగా, వీరిలో 13,776 మంది పురుషులు, 13,527 మంది మహిళలు, ఒకరు ఇతర ఓటర్లు ఉన్నారు. ఈ గణాంకాలు స్థానిక రాజకీయ వర్గాల్లో ఆసక్తి రేపుతున్నాయి.
గ్రామాల్లో మారనున్న రాజకీయ సమీకరణాలు!
ఎంపీటీసీ, జెడ్పీటీసీ ఎన్నికల నేపథ్యంలో గ్రామాల్లో రాజకీయ సమీకరణాలు ఎలా మారుతాయన్న దానిపై ఆసక్తి నెలకొంది. గత ఎన్నికల్లో పోటీ చేసిన నాయకులు, కొత్తగా రాజకీయాల్లోకి రావాలనుకుంటున్న యువత ఈసారి తమ అదృష్టాన్ని పరీక్షించుకునేందుకు సిద్ధమవుతున్నారు. పాత నాయకులకు మరోసారి అవకాశం దక్కుతుందా? కొత్త ముఖాలకు పార్టీలు ప్రాధాన్యం ఇస్తాయా? అన్న చర్చ గ్రామాల్లో సాగుతోంది. ఎన్నికల షెడ్యూల్ విడుదలైతే ఆశావహుల ప్రయత్నాలు మరింత ఊపందుకోనున్నాయి.
మూడు పార్టీల మధ్య హోరాహోరీ పోరు?
రాబోయే ఎంపీటీసీ, జెడ్పీటీసీ ఎన్నికల్లో ప్రధానంగా కాంగ్రెస్, బీజేపీ, బీఆర్‌ఎస్ పార్టీల మధ్య పోటీ ఆసక్తికరంగా మారనుంది. అధికార కాంగ్రెస్ పార్టీ తన పట్టును నిలబెట్టుకోవాలని భావిస్తుండగా, బీజేపీ గ్రామీణ ప్రాంతాల్లో బలాన్ని పెంచుకోవాలని చూస్తోంది. మరోవైపు బీఆర్‌ఎస్ పార్టీ గత రాజకీయ పునాదులపై ఆశలు పెట్టుకుంటోంది. మూడు పార్టీల నుంచి టికెట్లు ఆశిస్తున్న నాయకులు తమ ప్రయత్నాలను ముమ్మరం చేస్తున్నారు. అభ్యర్థుల ఎంపిక, పార్టీ బలాబలాలు, స్థానిక రాజకీయ సమీకరణాలు ఈ ఎన్నికల్లో కీలక అంశాలుగా మారనున్నాయి. దీంతో స్థానిక సంస్థల ఎన్నికలపై రాజకీయ వర్గాల్లో ఆసక్తి నెలకొంది.
