1. ప్రతిపక్ష నేతల ప్రశ్నల దాడికి మంత్రి వివేక్ చురుగ్గా స్పందన
   

నవ్వుల మధ్య అభివృద్ధిపై గంభీర చర్చ

సిద్దిపేట, జులై 22 (విజయక్రాంతి): సిద్దిపేట జిల్లాలో మంగళవారం నిర్వహించిన అభివృద్ధి సమీక్షా సమావేశం రాష్ట్ర రాజకీయ రంగాన్ని కాసేపు నవ్వులతో నింపింది. జిల్లా ఇన్చార్జి మంత్రి గడ్డం వివేక్ వెంకటస్వామి అధ్యక్షతన జరిగిన ఈ సమీక్ష సమావేశంలో అధికారులతో పాటు, ప్రతిపక్ష నేతలు కూడా హాజరై సభా వాతావరణాన్ని ఉలిక్కిపడేలా చేశారు.

ఈ సమావేశంలో మాజీ మంత్రి, సిద్దిపేట శాసనసభ్యుడు తన్నీరు హరీష్ రావు, దుబ్బాక ఎమ్మెల్యే కొత్త ప్రభాకర్ రెడ్డి, ఎమ్మెల్సీ ప్రతాప్ రెడ్డి, ఎస్సీ, ఎస్టీ కమిషన్ చైర్మన్ బక్కి వెంకటయ్య, మున్సిపల్ చైర్పర్సన్ మంజుల, జిల్లా కలెక్టర్, అదనపు కలెక్టర్లు, జిల్లా స్థాయి అధికారులు పాల్గొన్నారు.

ఒక్కో శాఖపై సమీక్ష జరుగుతున్న క్రమంలో హరీష్ రావు అధికారులకు దిక్కు తెలియకుండా చేస్తున్న ప్రశ్నల వర్షం ఎదుర్కోవాల్సి వచ్చింది. ఏ శాఖ అయినా సరే  గణాంకాలతో, భూభాగాలతో, రూపాయల లెక్కలతో సమాధానాలకంటే ముందే హరీష్ రావే వివరాలు చెప్పేయడం చూసి మంత్రి సహా అధికారులు నివ్వెరపోయారు.

ఇవే సమాధానాలే అధికారులు చెప్పాలి కదా అంటూ మంత్రి వివేక్ ఎద్దేవా చేస్తే, హరీష్ రావు కూడా నవ్వుతూ వ్యంగ్యంగా స్పందించడంతో సభా మందిరంలో నవ్వుల జల్లు కురిసింది. ఇక అప్పుడే ముగిసిన రేషన్ కార్డుల పంపిణీ కార్యక్రమం ఒకింత రసాభాసగా మారిన నేపథ్యం కూడా ఈ సమావేశానికి మరింత ఊతమిచ్చింది. అది చూసి నవ్వులు ఆపుకోలేని అధికారులు తారసపడ్డ దృష్టాంతంగా మారింది.

‘మీకు సిద్దిపేట గురించి అంత తెలుసు అంటూ మంత్రివర్యులు చేసిన వ్యాఖ్యలపై చుట్టూ ఉన్నవారు కలిసే నవ్వారు. ‘ఇది సమీక్షా సమావేశమా? లేక జ్ఞాపకాల పండుగా?‘ అన్నట్లుగా మారిన ఈ సమాలోచనలో పలు సీరియస్ అంశాలపై చర్చ జరిగినప్పటికీ, చలాకీ మాటలు, ఘాటు వ్యాఖ్యలు కలగలసి హాస్యరసాన్ని కలిగించాయి.

ఒక్కోసారి వ్యవసాయం పై, మరోసారి ఆరోగ్యంపై, ఇంకోసారి విద్యపై చర్చలు సాగగా  హరీష్ రావు ఎప్పటిలాగే డేటాతో, పూర్తి అవగాహనతో తన వ్యాఖ్యల ద్వారా సభలో తన ప్రభావాన్ని చూపించారు. ఈ సమావేశం ఒకవైపు అభివృద్ధి ప్రణాళికల సమీక్ష అయితే, మరోవైపు రాజకీయ నేతల మధ్య స్నేహం, వ్యంగ్యం, హాస్యం కలిసి ఉన్న అనునీత దృశ్యంగా నిలిచింది. ‘విమర్శలతోనే కదలే అభివృద్ధి యంత్రం, అవగాహనతో ఊపందుకునే నాయకత్వం‘ అన్న భావనను సభ మొత్తం తనంతతానె చెప్పినట్లైంది.