వారణాసి: ప్రధానమంత్రి నరేంద్ర మోదీ(Prime Minister Narendra Modi) శనివారం ఉత్తరప్రదేశ్‌లోని వారణాసిలో పర్యటిస్తున్నారు. నరేంద్ర మోదీ శనివారం మౌలిక సదుపాయాలు, విద్య, ఆరోగ్య సంరక్షణ, పర్యాటకం, పట్టణాభివృద్ధి, సాంస్కృతిక వారసత్వం వంటి బహుళ కీలక రంగాలకు చెందిన ప్రాజెక్టులను ప్రారంభించారు. ఈ కార్యక్రమాలు వారణాసిలో సమగ్ర పట్టణ పరివర్తనను నడిపించడానికి, సాంస్కృతిక వారసత్వాన్ని పునరుజ్జీవింపజేయడానికి, కనెక్టివిటీని మెరుగుపరచడానికి, మొత్తం జీవన నాణ్యతను పెంచడానికి రూపొందించబడ్డాయి. ఉదయం 11 గంటలకు వారణాసిలో అడుగుపెట్టిన ప్రధాని మోడీ దాదాపు 2,200 కోట్ల రూపాయల విలువైన అనేక అభివృద్ధి ప్రాజెక్టులకు శంకుస్థాపన చేసి, ప్రారంభించారు. 

తన పర్యటనకు ముందు, ప్రధాని మోదీ ఎక్స్ లో ఇలా రాశారు, "ఆగస్టు 2 కాశీలోని నా కుటుంబ సభ్యులకు చాలా ప్రత్యేకమైన రోజు. రేపు ఉదయం 11 గంటల ప్రాంతంలో, విద్య, ఆరోగ్యం, క్రీడలు, పర్యాటకం, కనెక్టివిటీకి సంబంధించిన అనేక ప్రాజెక్టులను ప్రారంభించి, శంకుస్థాపన చేస్తాను. ఈ సందర్భంగా, పీఎం-కిసాన్ పథకం 20వ విడతను విడుదల చేసే గౌరవం కూడా నాకు లభిస్తుంది." అని పేర్కొన్నారు. ఉత్తరప్రదేశ్ ముఖ్యమంత్రి యోగి ఆదిత్యనాథ్(Chief Minister Yogi Adityanath) మోదీని సత్కరించారు. వారణాసిలో అడుగుపెట్టిన ప్రధానమంత్రి నరేంద్ర మోడీకి విమానాశ్రయంలో యూపీ ముఖ్యమంత్రి యోగి ఆదిత్యనాథ్, కేంద్ర మాజీ మంత్రి మహేంద్రనాథ్ పాండే స్వాగతం పలికారు.