న్యూఢిల్లీ: ఎన్‌ఫోర్స్‌మెంట్ డైరెక్టరేట్ (Enforcement Directorate) దాఖలు చేసిన మనీలాండరింగ్ ఫిర్యాదుకు సంబంధించి కాంగ్రెస్ నాయకురాలు ప్రియాంక గాంధీ(Priyanka Gandhi) వాద్రా భర్త రాబర్ట్ వాద్రాకు ఢిల్లీలోని రౌస్ అవెన్యూ కోర్టు శనివారం నోటీసు జారీ చేసింది. ఆగస్టు 28న ఎన్‌ఫోర్స్‌మెంట్ డైరెక్టరేట్ ఈడీ కొత్త ఛార్జిషీట్ దాఖలు చేసిన తర్వాత ఈ పరిణామం జరిగింది. దర్యాప్తులో భాగంగా, రాబర్ట్ వాద్రా, అతని అనుబంధ సంస్థలకు సంబంధించిన రూ.37.64 కోట్ల విలువైన 43 స్థిరాస్తులను ఈడీ జప్తు చేసింది. ఆయనతో పాటు మరో 10 మందిపై ప్రాసిక్యూషన్ ఫిర్యాదులు దాఖలయ్యాయి. శుక్రవారం రౌస్ అవెన్యూ కోర్టు(Rouse Avenue Court) వాద్రాతో పాటు ఈడీ కేసులో నిందితులుగా జాబితా చేయబడిన అనేక మంది వ్యక్తులు, కంపెనీలకు నోటీసులు జారీ చేసింది. 

ఈ కేసులో ముగ్గురు వ్యక్తులు, ఎనిమిది సంస్థలపై ఎన్‌ఫోర్స్‌మెంట్ డైరెక్టరేట్ ఇటీవల చార్జిషీట్ దాఖలు చేసింది. ఆగస్టు 28న జరిగే విచారణలో వారి పాత్రలను ప్రీ-కాగ్నిసెన్స్ స్థాయిలో పరిశీలిస్తారు.  గురుగ్రామ్‌లోని షికోపూర్ గ్రామంలో జరిగిన అక్రమ భూ ఒప్పందానికి సంబంధించిన ఈ చార్జిషీట్‌లో రాబర్ట్ వాద్రా(Robert Vadra), అతని కంపెనీ మెస్సర్స్ స్కై లైట్ హాస్పిటాలిటీ ప్రైవేట్ లిమిటెడ్ మోసపూరిత మార్గాల ద్వారా 3.53 ఎకరాల భూమిని కొనుగోలు చేశారని ఆరోపించింది. షికోహ్‌పూర్ భూ ఒప్పందం కేసులో కొనసాగుతున్న దర్యాప్తులో భాగంగా, వాద్రా, అతని సంస్థకు సంబంధించిన ఆస్తులను ఈడీ ఇప్పటికే జప్తు చేసింది.  ఈ కేసు 2008లో గురుగ్రామ్ పోలీసులు దాఖలు చేసిన ఎఫ్ఐఆర్ నాటిది, వాద్రా కంపెనీ తప్పుడు డిక్లరేషన్ ఉపయోగించి మెస్సర్స్ ఓంకారేశ్వర్ ప్రాపర్టీస్ ప్రైవేట్ లిమిటెడ్ నుండి రూ. 7.5 కోట్లకు భూమిని కొనుగోలు చేసిందని ఆరోపించింది.