న్యూఢిల్లీ: జాతీయ రాజధానిలో వాయు కాలుష్యం తీవ్రమవుతున్న నేపథ్యంలో ఢిల్లీ-ఎన్‌సీఆర్ ప్రాంతంలో బీఎస్-IV ఉద్గార ప్రమాణాలకు అనుగుణంగా లేని పాత వాహనాలపై చర్యలు తీసుకోవడానికి సుప్రీంకోర్టు అధికారులకు అనుమతి ఇచ్చింది. గాలి నాణ్యతపై ఈ వాహనాల ప్రతికూల ప్రభావాన్ని ఉదహరిస్తూ, ఢిల్లీ ప్రభుత్వం కోర్టు మునుపటి ఉత్తర్వులో మార్పు కోరిన తర్వాత ఈ నిర్ణయం వెలువడింది. పాత, అధిక కాలుష్యాన్ని వెదజల్లే వాహనాలను నిరంతరం ఉపయోగించడం వల్ల కాలుష్య స్థాయిలు తీవ్రంగా పెరిగిపోతున్నాయని ప్రభుత్వం తరుపు న్యాయవాది వివరించారు.  గతంలో ఈ వాహనాలపై ఎలాంటి బలవంతపు చర్యలు తీసుకోకూడదని సుప్రీంకోర్టు ఆదేశించింది. అయితే, ప్రస్తుత వాయు నాణ్యత పరిస్థితిని పరిగణనలోకి తీసుకుని, ఆ ప్రాంతంలోని పాత బీఎస్-IV వాహనాలపై చర్యలు తీసుకోవడానికి కోర్టు ఇవాళ అనుమతి ఇచ్చింది.