మేడారంలో వేడినీళ్లు యమా హాట్!

బకెట్ ధర రూ. 50 

చలికి గజగజ వణుకుతున్న పిల్లలు, మహిళలు, వృద్ధులు

మేడారం, డిసెంబర్ 26 (విజయక్రాంతి): ఓవైపు గజగజ వణికిస్తున్న చలి.. మరోవైపు జంపన్న వాగులో చన్నీటి స్నానం చేయడానికి ఇబ్బందులు పడే భక్తులకు ఈసారి మేడారంలో వేడినీళ్ల సౌకర్యం కల్పించారు. అయితే హాట్ వాటర్ బకెట్ ధర 50 రూపాయలు నిర్ణయించడంతో కొందరు భక్తులు చేసేదేమీ లేక అంత ధరకు కొనుక్కొని స్నానం చేస్తున్నారు. ముందస్తుగా మేడారం జాతరకు వస్తున్న భక్తుల్లో మహిళలు, వృద్ధులు, చంటి పిల్లలు వేడినీటి స్నానానికి ప్రాధాన్యం ఇస్తుండడంతో కొందరు ఇదే అదునుగా జంపన్న వాగు స్నానఘట్టాల వద్ద ప్రత్యేకంగా పొయ్యిలు ఏర్పాటుచేసి వేడి నీరు కాచి, బకెట్ నీళ్లు 50 రూపాయలకు విక్రయిస్తూ సొమ్ము చేసుకుంటున్నారు. ఇలా మేడారం జాతరలో కొందరికి వేడినీళ్ల విక్రయం కూడా ఈసారి ఒక ఉపాధిగా మారింది.