పారిస్‌: పారిస్‌లోని లౌవ్రే మ్యూజియం నుండి విలువైన కిరీట ఆభరణాల దొంగతనం కేసులో ఇద్దరు అనుమానితులను అరెస్టు చేసినట్లు సమాచారం. శనివారం రాత్రి 10 గంటలకు ఓ నిందితుడు చార్లెస్ డి గల్లె విమానాశ్రయం నుంచి అల్జీరియాకు వెళ్లేందు విమానం ఎక్కబోతుండగా అధికారులు ఆ వ్యక్తిని అదుపులోకి తీసుకున్నట్లు పారిస్ ప్రాసిక్యూటర్ కార్యాలయం తెలిపింది. ప్రపంచంలోనే అత్యధికంగా సందర్శించబడే మ్యూజియం నుండి గత ఆదివారం పట్టపగలు నలుగురు దొంగలు విద్యుత్ పరికరాలను ఉపయోగించి భవనంలోకి చొరబడి €88 మిలియన్ (£76 మిలియన్; $102 మిలియన్) విలువైన వస్తువులను దొంగిలించారు. ఈ విషయంలో భద్రతా ప్రోటోకాల్‌లు విఫలమయ్యాయని ఫ్రాన్స్ న్యాయ మంత్రి తెలిపారు. 

అనుమానితులలో ఒకరు అల్జీరియాకు వెళ్లడానికి సిద్ధమవుతున్నారని, మరొకరు మాలికి వెళ్తున్నారని పోలీసు వర్గాలు తెలిపాయి. దీంతో స్పెషలిస్ట్ పోలీసులు వారిని అదుపులోకి తీసుకొని 96 గంటల వరకు ప్రశ్నించవచ్చు.  మ్యూజియం సందర్శకులకు తెరిచిన కొద్దిసేపటికే దొంగలు ఉదయం 9:30 గంటలకు (GMT సమయం 06:30) వచ్చినట్లు తెలుస్తోంది.  సీన్ నదికి దగ్గరగా ఉన్న బాల్కనీ ద్వారా గ్యాలరీ డి'అపోలోన్ (అపోలో గ్యాలరీ)కి చేరుకోవడానికి అనుమానితులు వాహనంలో అమర్చిన మెకానికల్ లిఫ్ట్‌తో వచ్చారు. దొంగలలో ఇద్దరు విద్యుత్ పరికరాలతో కిటికీని చీల్చుకుని లోపలికి ప్రవేశించి గార్డులను బెదిరించారు. తరువాత వారు ఆవరణను ఖాళీ చేసి, ఆభరణాలు ఉన్న రెండు డిస్ప్లే కేసుల అద్దాన్ని పగులగొట్టారు.

ఫ్రెంచ్ మీడియా ప్రకారం... మ్యూజియంలో దాడి చేయబడిన ప్రాంతంలోని మూడు గదుల్లో ఒకదానిలో సీసీటివీ కెమెరాలు లేవని, దొంగలు లోపల నాలుగు నిమిషాలు ఉన్నారని తెలిపింది. 09:38 గంటలకు బయట వేచి ఉన్న రెండు స్కూటర్లపై పారిపోయారని ఫ్రెంచ్ పోలీసులు తెలిపారు. లౌవ్రే బాహ్య గోడను పర్యవేక్షించే ఏకైక కెమెరా అపోలో గ్యాలరీకి దారితీసే మొదటి అంతస్తు బాల్కనీ నుండి దూరంగా ఉందని మ్యూజియం డైరెక్టర్ చెప్పారు. ఆభరణాలు ఇప్పటికే వందల ముక్కలుగా విరిగిపోయి ఉండవచ్చని నిపుణులు ఆందోళన వ్యక్తం చేశారు.