హైదరాబాద్: అకాల వర్షాలు రాష్ట్రవ్యాప్తంగా వరి పంటలను దెబ్బతీశాయని మాజీ మంత్రి, సిద్దిపేట ఎమ్మెల్యే తన్నీరు హరీష్ రావు(BRS MLA Harish Rao) ఆవేదన వ్యక్తం చేశారు. కాంగ్రెస్ ప్రభుత్వం సేకరణలో జాప్యాన్ని విమర్శిస్తూ, ముఖ్యమంత్రి రేవంత్ రెడ్డి త్వరగా చర్యలు తీసుకోవాలని కోరారు. “ప్రతి కొనుగోలు కేంద్రంలో రైతులు కన్నీళ్లు పెట్టుకుంటున్నారు. ఆరు నెలలుగా కష్టపడి పండించిన పంట ఇప్పుడు ఉరుములతో తడిసి దెబ్బతింది” అని హరీశ్ రావు తెలిపారు. 

''కని పెంచిన పిల్లలు కళ్ళ ముందే కనుమరుగు అయినట్టు, ఇంటి దూలం ఇరిగి ఒక్కసారిగా  భుజం మీద పడ్డట్టు, ఆరుగాలం శ్రమించి పండించిన పంట గాలి వానకు తడిసి ముద్ద అయితే అన్నదాతకు ఎంత యాతనా, ఎంత కడుపు కోత? రాష్ట్రంలో ఏ కొనుగోలు కేంద్రం వద్ద చూసినా రైతన్నల కన్నీటి గాథలే, ఎవరిని కదిలించినా కన్నీటి వేదనే'' అంటూ హరీశ్ రావు ఎక్స్ లో పోస్టు చేశారు. ముఖ్యమంత్రిని నేరుగా విమర్శిస్తూ, పోలీసు రక్షణ మధ్య ఇంటిగ్రేటెడ్ కమాండ్ కంట్రోల్ సెంటర్ నుండి సమీక్షలు నిర్వహిస్తున్న రేవంత్ రెడ్డి కళ్ళు తెరిచి రైతులను రక్షించడానికి రావాలని హరీష్ రావు డిమాండ్ చేశారు. “రైతులు ఇబ్బందుల్లో ఉన్నారు. తడిసిన ప్రతి ధాన్యాన్ని కొనుగోలు చేస్తామని వారికి హామీ ఇవ్వండి.  కొనుగోళ్ళు వేగంగా జరిపి రైతుల ఖాతాల్లో డబ్బులు జమ చేయండి. దేశానికే అన్నం పెట్టే రైతుల బతుకులు కాపాడండి” అని మాజీ మంత్రి  ప్రభుత్వాన్ని కోరారు.