హైదరాబాద్: ముఖ్యమంత్రి రేవంత్ రెడ్డి(Chief Minister Revanth Reddy) నేతృత్వంలోని ఉన్నత స్థాయి ప్రతినిధి బృందం బుధవారం దేశ రాజధానికి బయలుదేరనుంది. ఈ పర్యటన ముఖ్య ఉద్ధేశ్యం స్థానిక సంస్థల ఎన్నికల్లో వెనుకబడిన తరగతులకు 42 శాతం బీసీ రిజర్వేషన్లు(42 Percent OBC Reservation) కల్పించడానికి పార్టీలకు అతీతంగా ఎంపీల మద్దతు కూడగట్టడానికి అని అధికారిక వర్గాలు తెలిపాయి. ఆయన మధ్యాహ్నం నాటికి ఢిల్లీ చేరుకుంటారు.

కాంగ్రెస్ పార్టీ సీనియర్ నాయకులైన సోనియా గాంధీ, రాహుల్ గాంధీ, ఏఐసీసీ అధ్యక్షులు మల్లికార్జున ఖర్గేతో పాటు, కొంతమంది ఎంపీలు, కేంద్ర మంత్రులను రేవంత్ రెడ్డి రేపు కలిసి ప్రజెంటెషన్ ఇవ్వనున్నారు. బీసీ రిజర్వేషన్ల బిల్లుపై లోక్ సభ, రాజ్యసభల్లో ఒత్తిడి చేయాలని, అలాగే ఇండియా కూటమిలోని ఇతర పార్టీల ఎంపీల మద్దతు సీఎం రేవంత్ రెడ్డి కోరనున్నారు. రాజ్యాంగంలోని తొమ్మిదో షెడ్యూలులో చేర్చేందుకు ఒత్తిడి తీసుకురావాలని ప్రభుత్వం ప్రయత్నం చేస్తున్నట్లు సమాచారం.

తెలంగాణలో కాంగ్రెస్ ప్రభుత్వం అత్యంత ప్రతిష్టాత్మకంగా నిర్వహించిన కుల సర్వే విధివిధానాలు, అమలుపై కాంగ్రెస్ కేంద్ర నాయకత్వానికి వివరించడమే ఈ ప్రతినిధి బృందం లక్ష్యం అని డిప్యూటీ సీఎం భట్టి విక్రమార్క బుధవారం తెలిపారు. తెలంగాణ ప్రభుత్వ లక్ష్యం బీసీ బిల్లును పార్లమెంటులో త్వరగా ప్రవేశపెట్టి దానికి మద్దతు కూడగట్టడం. భారత జాతీయ కాంగ్రెస్ నుండి దాదాపు 100 మంది పార్లమెంటు సభ్యులు కూడా ఈ చొరవలో చేరతారని విక్రమార్క అన్నారు. జాతీయ జనాభా లెక్కల్లో కుల డేటాను చేర్చడానికి అనుమతించే ప్రతిపాదిత చట్టానికి ప్రతినిధి బృందం పార్లమెంటు సభ్యుల మద్దతును కూడా కోరుతుంది.