ఇటీవలి కాలంలో భారత క్రికెట్ దిగ్గజాలు రోహిత్ శర్మ,  విరాట్ కోహ్లీల అడుగుజాడల్లోనే మహమ్మద్ షమీ కూడా టెస్ట్ క్రికెట్ నుంచి రిటైర్మెంట్(Mohammed Shami retirement rumours) ప్రకటించనున్నాడని సామాజిక మాద్యమాల్లో విస్తృతంగా పుకార్లు వ్యాపించాయి. భారత పేసర్ మహమ్మద్ షమీ(Mohammed Shami (మొహమ్మద్ షమీ) ఈ ఫార్మాట్ నుంచి వైదొలగడానికి సిద్ధమవుతున్నాడనే ఊహాగానాలు సోషల్ మీడియా వేదికలపై జోరుగా వినిపిస్తున్నాయి. ఈ పుకార్లపై స్పందించిన మహమ్మద్ షమీ తీవ్రంగా ఖండించారు. ఈ వాదనలకు మూలకారకులపై విమర్శలు గుప్పించారు. తన రిటైర్మెంట్ గురించి ఒక ఆంగ్ల భాషా వెబ్‌సైట్‌లో ప్రచురించబడిన వార్తా కథనాన్ని తోసిపుచ్చుతూ, మహమ్మద్ షమీ ఆ నివేదికకు కారణమైన జర్నలిస్ట్‌పై ఆగ్రహం వ్యక్తం చేశారు.

"నా రిటైర్మెంట్ గురించి వ్యాఖ్యానించే ముందు మీ స్వంత ఉద్యోగానికి వీడ్కోలు పలికే రోజులు లెక్కించడం ప్రారంభించండి" అని మహమ్మద్ షమీ తన సోషల్ మీడియా(Social media) ఖాతాలో పేర్కొన్నారు. "మీలాంటి వ్యక్తులు జర్నలిజాన్ని పూర్తిగా నాశనం చేశారు. ఆటగాడి భవిష్యత్తు గురించి ఒక ఖచ్చితమైన అంచనా వేయడానికి ప్రయత్నించండి. ఇది నేను ఈ రోజు చూసిన చెత్త వార్త. క్షమించండి." అంటూ పోస్టు చేశారు. గాయం నుండి కోలుకున్న తర్వాత, మహమ్మద్ షమీ ఛాంపియన్స్ ట్రోఫీకి ముందు భారత జట్టులోకి తిరిగి వచ్చాడు. కానీ తన మునుపటి ఫామ్‌ను తిరిగి పొందడంలో చాలా కష్టపడ్డాడు. ఫలితంగా, ఇంగ్లాండ్‌తో జరగనున్న టెస్ట్ సిరీస్‌కు అతను ఎంపిక కాకపోవచ్చు అనే ఊహాగానాలు తలెత్తాయి.

ఇండియన్ ప్రీమియర్ లీగ్ (Indian Premier League)లో అతని పేలవమైన ప్రదర్శన మధ్య, విమర్శకులు సోషల్ మీడియాలో వ్యాఖ్యలు చేస్తున్నారు. కొంతమంది నెటిజన్లు  సోషల్ మీడియా పోస్ట్‌ల ద్వారా ఇంగ్లాండ్ టూర్ జట్టు నుండి అతనిని తొలగించాలని వ్యాఖ్యానించారు.  విమర్శలు ఉన్నప్పటికీ, భారతదేశంలో జరిగిన 2023 ఐసీసీ పురుషుల క్రికెట్ ప్రపంచ కప్‌లో మహమ్మద్ షమీ అత్యుత్తమ ప్రదర్శన కనబరిచాడు. అతను టీమ్ ఇండియాను ఫైనల్‌కు చేర్చడంలో కీలక పాత్ర పోషించాడు. కేవలం ఏడు మ్యాచ్‌ల్లో 24 వికెట్లు పడగొట్టాడు. టోర్నమెంట్‌లో అత్యధిక వికెట్లు తీసిన బౌలర్‌గా నిలిచాడు. తన కెరీర్‌లో, మహమ్మద్ షమీ 64 టెస్ట్ మ్యాచ్‌లు, 108 వన్డే ఇంటర్నేషనల్స్ (ODIలు)25 ట్వంటీ20 ఇంటర్నేషనల్స్ (T20Iలు) ఆడి మొత్తం 462 అంతర్జాతీయ వికెట్లు సాధించాడు.