న్యూఢిల్లీ: విజయదశమి సందర్భంగా 100 సంవత్సరాలు పూర్తి చేసుకుంటున్న రాష్ట్రీయ స్వయం సేవక్ సంఘ్ (ఆర్‌ఎస్‌ఎస్) "అపూర్వమైన, స్ఫూర్తిదాయకమైన" ప్రయాణాన్ని ప్రధానమంత్రి నరేంద్ర మోడీ ఆదివారం ప్రశంసించారు. తన నెలవారీ రేడియో కార్యక్రమం మన్ కీ బాత్ 126వ ఎపిసోడ్‌ను ఉద్దేశించి ప్రధాని మోదీ మాట్లాడుతూ... ఈ విజయదశమి చాలా ప్రత్యేకమైనది. ఈ రోజుకు రాష్ట్రీయ స్వయంసేవక్ సంఘ్ స్థాపించి 100 సంవత్సరాలు పూర్తయిందన్నారు. ఈ శతాబ్దపు ప్రయాణం అద్భుతమైనది, అపూర్వమైనది, స్ఫూర్తిదాయకం అని ఆయన పేర్కొన్నారు.

స్వాతంత్య్రానికి ముందు భారతదేశంలో గుర్తింపు సంక్షోభం మధ్య సంఘ్ ఏర్పడిందని గతంలో ఆర్‌ఎస్‌ఎస్‌లో భాగమైన ప్రధాని మోదీ అన్నారు. 100 ఏళ్ల క్రితం ఆర్‌ఎస్‌ఎస్ స్థాపించబడినప్పుడు దేశం శతాబ్దాలుగా బానిసత్వ గొలుసులలో బంధించబడిందని వాపోయ్యారు. శతాబ్దాల పాటు కొనసాగిన ఈ బానిసత్వం మన ఆత్మగౌరవాన్ని, ఆత్మవిశ్వాసాన్ని తీవ్రంగా దెబ్బతీసిందని, ప్రపంచంలోని పురాతన నాగరికత గుర్తింపు సంక్షోభాన్ని ఎదుర్కొంటోంది. మన పౌరులు న్యూనతా భావానికి బాధితులుగా మారుతున్నారని అన్నారు.

 విజయదశమి శుభ సందర్భంగా రాష్ట్రీయ స్వయంసేవక్ సంఘాన్ని హెడ్గేవార్ జీ 1925లో స్థాపించారు. హెడ్గేవార్ మరణానంతరం, గురూజీ దేశానికి సేవ చేయాలనే ఈ గొప్ప లక్ష్యాన్ని ముందుకు తీసుకెళ్లారని ప్రధాని మోదీ కొనియాడారు. ఆర్‌ఎస్‌ఎస్ బోధనలను ప్రశంసిస్తూ, దేశంలో ప్రకృతి వైపరీత్యం నేపథ్యంలో సహాయ చర్యలకు సంఘ్ మద్దతు ఇచ్చినందుకు ఆయన ప్రశంస్తూ ఆర్ఎస్ఎస్ శతాబ్ది ఉత్సవాలకు శుభాకాంక్షలు తెలిపారు.

"త్యాగం, సేవా స్ఫూర్తి, క్రమశిక్షణ బోధనలే సంఘ్ నిజమైన బలం" అని ప్రధాని మోదీ అన్నారు. నేడు, ఆర్‌ఎస్‌ఎస్ వంద సంవత్సరాలుగా అవిశ్రాంతంగా దేశ సేవలో నిమగ్నమైందని, అందుకే దేశంలో ఎక్కడైనా ప్రకృతి వైపరీత్యం సంభవించినప్పుడు, ఆర్‌ఎస్‌ఎస్ స్వచ్ఛంద సేవకులు ముందుగా అక్కడికి చేరుకోవడం మనం చూస్తున్నామన్నారు.

లక్షలాది మంది స్వచ్ఛంద సేవకుల జీవితాల్లోని ప్రతి చర్యలోనూ, ప్రతి ప్రయత్నంలోనూ 'దేశం ముందు' అనే ఈ స్ఫూర్తి ఎల్లప్పుడూ ప్రధానమైనది. దేశానికి సేవ చేసే గొప్ప యజ్ఞానికి తనను తాను అంకితం చేసుకుంటున్న ప్రతి స్వచ్ఛంద సేవకు తను శుభాకాంక్షలు తెలియజేస్తున్నానని మోదీ చెప్పారు.రాష్ట్రీయ స్వయంసేవక్ సంఘ్ (RSS) తన శతాబ్ది సంవత్సరాన్ని విజయదశమి (దసరా) 2025 నుండి విజయదశమి 2026 వరకు జరుపుకుంటుంది. 1925లో కేబీ హెడ్గేవార్ స్థాపించినప్పటి నుండి 100 సంవత్సరాలు పూర్తవుతుంది. అంతకుముందు, ఎర్రకోట నుండి తన 79వ స్వాతంత్ర్య దినోత్సవ ప్రసంగంలో ప్రధానమంత్రి మోదీ సంఘ్‌ను ప్రశంసించారు. దీనిని ప్రపంచంలోనే అతిపెద్ద ఎన్జీఓగా అభివర్ణించారు.

"ఈరోజు, 100 సంవత్సరాల క్రితం ఒక సంస్థ ఆవిర్భవించిందని నేను గర్వంగా చెప్పాలనుకుంటున్నాను - రాష్ట్రీయ స్వయంసేవక్ సంఘ్ (RSS). దేశానికి 100 సంవత్సరాల సేవ గర్వించదగిన, సువర్ణ అధ్యాయం. 'వ్యక్తి నిర్మాణ్ సే రాష్ట్ర నిర్మాణ్' అనే సంకల్పంతో, మా భారతి సంక్షేమం లక్ష్యంతో, స్వయంసేవకులు మన మాతృభూమి సంక్షేమానికి తమ జీవితాలను అంకితం చేశారు... ఒక విధంగా, RSS ప్రపంచంలోనే అతిపెద్ద NGO. దీనికి 100 సంవత్సరాల అంకితభావ చరిత్ర ఉంది" అని ప్రధాని మోదీ ఆగస్టు 15న అన్నారు.