చైబాసా: జార్ఖండ్‌లోని పశ్చిమ సింగ్‌భూమ్ జిల్లాలో ఒక అడవి ఏనుగు(Wild Elephant Attack) జరిపిన రెండు వేర్వేరు దాడులలో ఒకే కుటుంబానికి చెందిన నలుగురితో సహా కనీసం ఆరుగురు మరణించారని ఒక సీనియర్ అటవీ అధికారి బుధవారం తెలిపారు. గత కొన్ని రోజులుగా పలువురిపై దాడి చేసిన ఆ ఏనుగు, మంగళవారం రాత్రి నోవాముండి, హత్‌గమారియా పోలీస్ స్టేషన్ల పరిధిలోకి ప్రవేశించి ఆరుగురిని చంపిందని చైబాసా డివిజనల్ ఫారెస్ట్ ఆఫీసర్ ఆదిత్య నారాయణ్ తెలిపారు. ఏనుగు దాడిలో నలుగురు వ్యక్తులు కూడా గాయపడ్డారని మరో అటవీ అధికారి తెలిపారు. ఒక కుటుంబానికి చెందిన ముగ్గురితో సహా ఏడు మంది ప్రాణాలను ఆ ఏనుగు ఒక రోజు క్రితం బలిగొందని నారాయణ్ చెప్పారు. పశ్చిమ బెంగాల్‌లోని బంకురా జిల్లాకు చెందిన నిపుణులతో కూడిన అటవీ అధికారుల బృందాలు ఏనుగును తిరిగి అడవిలోకి తరిమివేయడానికి రంగంలోకి దిగాయని ఆ అధికారి తెలిపారు. ఇదిలా ఉండగా, ఏనుగుల సంచారం కారణంగా ఆ ప్రాంతంలో పలు రైళ్లను రద్దు చేశారు.