హైదరాబాద్: తెలంగాణ నీటిపారుదల శాఖ రిటైర్డ్ ఇంజనీర్-ఇన్-చీఫ్(Retired Engineer-in-Chief) మురళీధర్ రావును ఇటీవల అరెస్టు చేసిన తర్వాత ACB (Anti Corruption Bureau) కోర్టు 14 రోజుల జ్యుడీషియల్ కస్టడీకి పంపింది. కోర్టు ఆదేశం తర్వాత పోలీసులు అతన్ని చంచల్‌గూడ జైలుకు తరలించారు. ఆదాయ వనరులకు మించి ఆస్తులు కూడబెట్టారనే ఆరోపణలకు సంబంధించి అవినీతి నిరోధక శాఖ చేపట్టిన ప్రధాన దర్యాప్తు నేపథ్యంలో ఈ అరెస్టు జరిగింది. 

జూలై 15వ తేదీ మంగళవారం ఉదయం హైదరాబాద్‌లోని బంజారాహిల్స్‌లోని మురళీధర్ రావు(Muralidhar Rao) నివాసంతో పాటు, ఆయనకు, ఆయన కుటుంబ సభ్యులకు సంబంధించిన 11 ఇతర ప్రదేశాలలో ఏసీబీ అధికారులు దాడులు నిర్వహించారు. ఈ ఏకకాల సోదాలు పగలు, రాత్రి వరకు కొనసాగాయి. ఈ దాడులలో మురళీధర్ రావు పేరు మీద, అతని బంధువులు, సహచరుల పేర్లపై భారీగా ఆక్రమ ఆస్తులున్నట్లు అధికారులు గుర్తించారు. బీఆర్ఎస్ ప్రభుత్వ(BRS Government) హయాంలో కూడా నీటిపారుదల శాఖలో 13 సంవత్సరాలకు పైగా పనిచేసిన మురళీధర్ రావు, ముఖ్యంగా కాళేశ్వరం, మేడిగడ్డ నీటిపారుదల ప్రాజెక్టుల వంటి ఉన్నత స్థాయి ప్రాజెక్టులకు సంబంధించి భారీ అవినీతి కుంభకోణాలలో పాల్గొన్నట్లు ఆరోపణలు ఎదుర్కొంటున్నారు. ఈ ప్రాజెక్టులలోని అవకతవకలకు సంబంధించి జస్టిస్ పిసి ఘోష్ కమిషన్ గతంలో ఆయనను ప్రశ్నించింది.