ప్రాణాలకు తెగించి కరెంటు సరఫరాను పునరుద్ధరించిన లైన్‌మెన్‌కు మంత్రి ప్రశంస

హుస్నాబాద్, ఆగస్టు15 : తన విధి నిర్వహణలో చూపించిన అపారమైన ధైర్యం, నిబద్ధతకు గుర్తింపుగా లైన్మన్ హైముద్దీన్ను రవాణా, బీసీ సంక్షేమ శాఖ మంత్రి పొన్నం ప్రభాకర్ అభినందించారు. కోహెడ మండలం నాగసముద్రాల చెరువులో తెగిపడిన 11 కేవీ విద్యుత్ లైన్లను తన ప్రాణాలను పణంగా పెట్టి పునరుద్ధరించినందుకు మంత్రి ఆయనకు శుక్రవారం ప్రశంసాపత్రాన్ని అందజేశారు. 

నాగసముద్రాల చెరువులో ఇటీవల 11 కేవీ విద్యుత్ లైన్లు తెగిపడి భారీ ప్రమాదానికి దారితీసే పరిస్థితి ఏర్పడింది. విద్యుత్ సరఫరా నిలిచిపోవడమే కాకుండా, తెగిపడిన తీగలతో  ఎవరైనా ప్రమాదవశాత్తు చెరువులోకి దిగితే పెను ప్రమాదం జరిగేది. ఈ అత్యవసర పరిస్థితిని గమనించిన లైన్మన్ హైముద్దీన్, తన అసిస్టెంట్ లైన్మన్తో కలిసి వెంటనే రంగంలోకి దిగారు. సాధారణంగా చెరువులలో ఇలాంటి రిపేర్లు చేయడం అత్యంత ప్రమాదకరమైన విషయం.

హైముద్దీన్ తన అపారమైన అనుభవం, ధైర్యంతో కూడిన సంకల్పంతో చెరువులోకి దిగి, అతి జాగ్రత్తగా తెగిపడిన తీగలను సరిచేశారు. ఆయన అసాధారణ కృషి, అంకితభావం కారణంగా విద్యుత్ సరఫరా త్వరగా పునరుద్ధరించబడింది. లైన్మన్ హైముద్దీన్ ధైర్యాన్ని, ప్రజాసేవ పట్ల ఆయనకున్న అంకితభావాన్ని గుర్తించిన మంత్రి పొన్నం ప్రభాకర్ స్వయంగా ఆయనను కలిసి అభినందించారు.

ప్రభుత్వం తరపున ఆయనకు ప్రశంసాపత్రాన్ని అందజేసి, భవిష్యత్తులో కూడా ఇదే విధమైన నిబద్ధతతో పనిచేయాలని సూచించారు. ఇది కేవలం ఒక ప్రశంస మాత్రమే కాదు, ప్రజల కోసం నిరంతరం పనిచేసే సాధారణ ఉద్యోగుల కృషికి ప్రభుత్వం ఇస్తున్న గుర్తింపు అని మంత్రి అన్నారు.