1. వర్షం కారణంగా దెబ్బతిన్న 580 భవనాలు 
2. ప్రమాదకర భవనాల నుంచి సురక్షిత భవనాల్లోకి మార్చాలి 
3. బియ్యం, సరుకులు తడిసినచోట సరుకులు సరఫరా చేయాలి
4. ఆదేశాలు జారీ చేసిన మంత్రి సీతక్క

హైదరాబాద్, ఆగస్టు 29 (విజయక్రాంతి): రాష్ర్ట వ్యాప్తంగా కురిసిన భారీ వర్షాల కారణంగా అంగన్‌వాడీ కేంద్రాలకు నష్టం జరిగింది. మహిళా, శిశు సంక్షేమ శాఖ మంత్రి సీతక్క ఆదేశాల మేరకు అధికారులు సమగ్ర నివేదిక సిద్ధం చేసి   ప్రభుత్వానికి సమర్పించారు. సొంత భవనాల్లో నడుస్తున్న 440 అంగన్వాడీ కేంద్రాలు, రెంట్ ఫ్రీ భవనాల్లో నడుస్తున్న మరో 140 కేంద్రాలు కలిపి మొత్తం 580 భవనాలు దెబ్బతిన్నాయని అధికారులు తెలిపారు. 

పైకప్పుల లీకేజీలు, గోడలు, బేస్‌మెంట్‌లో పగుళ్లు, ఫ్లోర్ దెబ్బతినడం వంటి సమస్యలు ఎక్కువగా కనిపించినట్టు పేర్కొన్నారు. దెబ్బతిన్న భవనాల మరమ్మతులకు భారీగా నిధులు అవసరమవుతాయని అంచనా వేశారు. సొంత భవనాల మరమ్మతులకు రూ. 14 కోట్ల రూపాయలు, రెంట్ ఫ్రీ భవనాల మరమ్మత్తులకు రూ. 3 కోట్ల రూపాయలు ఖర్చవుతుందని అధికారులు లెక్కగట్టారు. భద్రాద్రి కొత్తగూడెం, నిర్మల్, కామారెడ్డి, గద్వాల్, హనుమకొండ, మెదక్, వనపర్తి, ఆసిఫాబాద్, ములుగు వంటి జిల్లాల్లో వందల సంఖ్యలో అంగన్వాడీ భవనాలు దెబ్బతిన్నాయి. 

తడిసి ముద్దయిన సరుకులు

కొన్ని కేంద్రాల్లో వర్షపు నీరు లోపలకు చేరడంతో బియ్యం, పప్పులు, పాల డబ్బులు, నూనె ప్యాకెట్లు, స్టడీ మెటీరియల్ తడిసి ముద్దయ్యాయి. ఈ నేపథ్యంలో తడిసిన భవనాల్లో అంగన్వాడీ సేవలు తక్షణం నిలిపివేయాలని, సమీపంలోని ప్రభుత్వ భవనాలు లేదా పాఠశాల ప్రాంగణాల్లో కేంద్రాలను తాత్కాలికంగా తరలించాలని మంత్రి సీతక్క అధికారులు ఆదేశించారు.

అలాగే తడిసిపోయిన సరుకుల బదులుగా వెంటనే కొత్త సరుకులను సరఫరా చేయాలని స్పష్టం చేశారు. పిల్లల పోషకాహారం, ఆరోగ్య పరిరక్షణ, విద్య ఒక్కరోజు కూడా అంతరాయం లేకుండా కొనసాగాలని మంత్రి సీతక్క సూచించారు. సురక్షిత భవనాల్లో అంగన్‌వాడీ సేవలు నిరంతరం కొనసాగించేలా చర్యలు తీసుకోవాలని అధికారులకు ఆదేశాలు జారీ చేశారు.