1. ప్రైవేట్ హాస్టళ్లలో ఫుడ్ సేఫ్టీ అధికారుల తనిఖీలు 
2. వెలుగులోకి విస్తుపోయే నిజాలు 
3. కుళ్లిన, కాలం చెల్లిన పదార్థాలతో వంటకాలు 
4. అపరిశుభ్రంగా కిచెన్ల పరిసరాలు 
5. నిర్వాహకులకు నోటీసులు

హైదరాబాద్ సిటీబ్యూరో, ఆగస్టు 9 (విజయక్రాంతి): నగరంలోని హోటళ్లు, రెస్టారెంట్లపై దాడులు చేస్తూ విస్తుపోయే విషయాలను బయటపెడుతున్న ఫుడ్ సేఫ్టీ అధికారులు.. ప్రైవేట్ హాస్టళ్లపై దృష్టి సారించారు. శుక్రవారం ఫుడ్ సేఫ్టీ అధికారులు గ్రేటర్ పరిధిలోని ఆయా ప్రాంతాల్లో ప్రైవేట్ హాస్టళ్లలో తనిఖీలు చేపట్టారు. హోటళ్లు, రెస్టారెంట్లలో ఎలాంటి పరిస్థితులు కనిపించాయో.. అచ్చంగా హాస్టళ్లలో అవే పరిస్థితులు కనిపించడం ఆందోళన కలిగిస్తోంది. ఈ తనిఖీల్లో నమ్మలేని నిజాలు వెలుగులోకి వచ్చాయి. కోచింగ్ సెంటర్లు అత్యధికంగా ఉండే ఆర్టీసీ క్రాస్‌రోడ్స్, అశోక్‌నగర్ పరిసరాల్లోని హాస్టళ్లలో తనిఖీలు చేపట్టిన అధికారులు.. నాన్‌వెజ్‌వెజ్ ఒకే ఫ్రిజ్‌లో నిల్వ చేసి ఉండడాన్ని, హాస్టళ్ల కిచెన్లు, వాష్ ఏరియాలు అపరిశుభ్రంగా ఉండడాన్ని గుర్తించారు.

ఆహార పదార్థాల తయారీలో రంగులతో కూడిన కెమికల్స్ వినియోగించడం, కాలం చెల్లిన, కుళ్లిన పదార్థాలను గమనించారు. వెంకటేశ్వర ఎగ్జిక్యూటివ్ పీజీ హాస్టల్ ఫర్ ఉమెన్ అండ్ గర్ల్స్, గ్రేస్ డీలక్స్ బాయ్స్ హాస్టల్, అభిశ్రయ్ బాయ్స్ హాస్టల్, అభిశ్రిత ఉమెన్ హాస్టల్, శ్రద్ధ ఎక్సెటెండ్ స్టే హాస్టల్, పద్మావతి పీజీ ప్రీమియం హాస్టల్, బాలాజీ బాయ్స్ హాస్టల్‌కు ఫుడ్ సరఫరా చేసే బాలాజీ దర్శన్ హోటళ్లలో తనిఖీలు చేపట్టినట్టు జీహెచ్‌ఎంసీ హెల్త్ విభాగం అడిషనల్ కమిషనర్ పంకజ తెలిపారు. ఫుడ్ సేఫ్టీ డిజిగ్రేటెడ్ అధికారి ఎన్ సూర్య పర్యవేక్షణలో జరిగిన ఈ తనిఖీల్లో పలు లోపాలను గుర్తించిన ఫుడ్ సేఫ్టీ అధికారులు హాస్టళ్ల నిర్వాహకులకు నోటీసులు జారీ చేశారు.  

తనిఖీలో బయటపడిన విషయాలు..

1. వెంకటేశ్వర పీజీ హాస్టల్ ఫర్ ఉమెన్ అండ్ గర్ల్స్‌లో కిచెన్ అపరిశుభ్రంగా ఉండడంతో పాటు కుళ్లిన కూరగాయలను గుర్తించారు. అదేవిధంగా ఎలాంటి మూతలు లేకుండా అపరిశుభ్రంగా ఉన్న సరుకులను, గడువు ముగిసిన మసాలాలను గమనించారు.  
2. గ్రేస్ డీలక్స్ బాయ్స్ హాస్టల్‌లో సరైన వెంటిలేషన్, లైటింగ్ లేకపోవడం, నాన్ వెజ్, వెజ్, ఇతర సరుకులు ఒకే ఫ్రిజ్‌లో నిల్వ ఉంచడం, మూతలు లేని డస్ట్ బిన్లు, నాణ్యత లేని సాస్ గుర్తించారు. 
3. అభిశ్రయ్ బాయ్స్ హాస్టల్‌లో డైనింగ్ ఏరియాలో సాలె పురుగులు, మురికిగా ఉండడం, నీరు నిలిచి ఉండడం, హాస్టల్ పరిసరాలు, గదులలో కీటకాలు ఉండడం గమనించారు. 
4. అభిశ్రిత ఉమెన్ హాస్టల్‌లో గడువు ముగిసిన ఫుడ్ లైసెన్స్,  కుళ్లిన టమాటాలు తదితరాలు గుర్తించారు. 
5. శ్రద్ధాస్ ఎక్సెటెండ్ స్టే హాస్టల్‌లో మురికిగా ఉన్న వాషింగ్ ఏరియా గోడలు, ఆహారంలో కలిపే రంగులు,  కాలం చెల్లిన చుడ్వా, వెనిగర్, టమాట, చిల్లీ సాస్, పెప్పర్ పౌడర్ కనిపించాయి.
6. బాలాజీ దర్శన్‌లో వాషింగ్ ఏరియా, కిచెన్ పరిసరాలలో అపరిశుభ్రత, ముడి సరుకులు సరిగా నిల్వ చేయకపోవడం, కిచెన్ పరిసరాలలో డస్ట్‌బిన్ ఉంచడం, వండిన ఆహార పదార్థాలు సరిగా నిల్వచేయకపోవడం గుర్తించారు.