1. క్రీడా సంస్కృతిని పెంపొందించేందుకు కృషి
2. తెలంగాణ స్పోర్ట్స్ హబ్ బోర్డ్ సమావేశంలో సీఎం రేవంత్ రెడ్డి
3. క్రీడా పోటీలు, సబ్ కమిటీల ఏర్పాటుపై తీర్మానాలు

హైదరాబాద్, ఆగస్టు 28 (విజయక్రాంతి ): జాతీయ, అంతర్జాతీయ స్థాయిలో క్రీడా విధానం, క్రీడల ప్రోత్సాహం విషయంలో ప్రతి ఒక్కరూ హైదరాబాద్ గురించి మాట్లాడుకోవాలనేదే తన లక్ష్యమని సీఎం రేవంత్ రెడ్డి అన్నారు. క్రీడా ప్రపంచానికి హైదరాబాద్ వేదికగా మారాలని ఆకాంక్షించారు. ఖేలో ఇండియా, కామన్ వెల్త్, ఒలింపిక్స్ వంటి ఏ పోటీలు నిర్వహించినా వాటిలో తెలంగాణకు అవకాశం కల్పించాలని తెలంగాణ స్పోర్ట్స్ హబ్ తీర్మానం చేసింది.

రాష్ర్టంలో క్రీడా పాలసీలో వివిధ అంశాలపై ప్రణాళిక రూపకల్పన, అమలుపై సబ్ కమిటీల ఏర్పాటుకు బోర్డు తీర్మానాలు చేసింది. తెలంగాణ స్పోర్ట్స్ హబ్ బోర్డు మొదటి సమావేశం హైదరాబాద్‌లో గురువారం జరిగింది. ఈ సందర్భంగా రేవంత రెడ్డి మాట్లాడుతూ తెలంగాణకు ఐటీ సంస్కృతి ఉందని, అలానే క్రీడా సంస్కృతి రావాలన్నారు. క్రీడారంగానికి గతంలోకంటే 16 రెట్లు బడ్జెట్ పెంచామని వివరించారు. క్రీడాకారులకు ప్రోత్సాహకాలతో పాటు ప్రభుత్వ ఉద్యోగాలు కల్పించామని తెలిపారు.

క్రీడా రంగం ప్రాధాన్యతను పెంచేందుకు యంగ్ ఇండియా స్పోర్ట్స్ యూనివర్సిటీని ఏర్పాటు చేశామన్నారు. క్రీడారంగంలో తెలంగాణను అగ్రగామిగా నిలిపేందుకు కార్యాచరణ ప్రణాళిక రూపొందించాలని కోరారు. నిధులు, నిపుణులు, నిర్వహణ అవసరమైనందునే బోర్డులో ప్రముఖ కార్పొరేట్లు, క్రీడాకారులు, క్రీడా నిర్వాహకులకు చోటు కల్పించామని తెలిపారు.

గ్రామస్థాయి నుంచి పోటీలు

బ్యాడ్మింటన్ క్రీడాకారుడు పుల్లెల గోపీచంద్ మాట్లాడుతూ గ్రామస్థాయి నుంచి క్రీడా పోటీలు దశలవారీగా ఉండాలని.. అప్పుడే మెరుగైన క్రీడాకారుల ఎంపిక సాధ్యమవుతుందన్నారు. హబ్ కో చైర్‌పర్సన్ ఉపాసన కొణిదెల మాట్లాడుతూ ఫిజి యోథెరపిస్టు కోర్సులను క్రీడా యూనివర్సిటీలో ప్రారంభించాలని కోరారు. అలాగే స్పోర్ట్స్ సామగ్రిపై పన్నుల భారం భారీగా ఉందని సీఎం దృష్టికి తీసుకొచ్చారు.

మాజీ క్రికెటర్ కపిల్‌దేవ్ మాట్లాడుతూ ప్రతి విద్యార్థి ఏదో ఒక క్రీడలో పాల్గొనేలా చేస్తే ఫలితాలు వాటంతటవే వస్తాయని, హర్యానాలో కుస్తీతోపాటు ప్రతి క్రీడకు పల్లెల్లో చోటు ఉందని గుర్తు చేశారు. ప్రముఖ షూటర్ అభినవ్ బింద్రా మాట్లాడుతూ ప్రతి పాఠశాలలో వ్యాయామ ఉపాధ్యాయుడు ఉండేలా చూడాలన్నారు.

ధాని ఫౌండేషన్ వీతా ధానీ మాట్లాడుతూ పాఠశాల స్థాయిలోనే క్రీడలకు ప్రాధాన్యం ఇవ్వాలన్నారు. ప్రముఖ క్రీడాకారుడు రవికాంత్ రెడ్డి మాట్లాడుతూ మనకు ఉన్న స్టేడియాలను మెరుగ్గా వినియోగించుకోవాలన్నారు. సమావేశంలో క్రీడల మంత్రి వాకిటి శ్రీహరి, ప్రత్యేక ముఖ్య కార్యదర్శి జయేశ్ రంజన్, స్పోర్ట్స్ అథారిటీ చైర్మన్ శివసేనారెడ్డి, ఎండీ సోనీ బాలదేవి తదితరులు పాల్గొన్నారు.

 పోటీల విధానాన్ని మార్చుతాం

 ఇప్పటివరకు ఉన్న క్రీడాపోటీల విధానాన్ని మార్చుతూ గ్రామ, మండల, శాసనసభ నియోజకవర్గస్థాయి పోటీలు నిర్వహిస్తామన్నారు. నియోజకవర్గస్థాయిలో విజేతలుగా నిలిచిన జట్ల మధ్య పార్లమెంట్ నియోజకవర్గ స్థాయి పోటీలు నిర్వహించి  రాష్ర్టస్థాయి జట్లను ఎంపిక చేస్తామన్నారు.

క్రీడా సామగ్రిపై ఉన్న పన్నుల తగ్గింపునకు కేంద్ర ప్రభుత్వంతో మాట్లాడతామని, తమ స్థాయిలో అవసరమైన ప్రోత్సాహాకాలు అందిస్తామని తెలిపారు. యంగ్ ఇండియా స్పోర్ట్స్ యూనివర్సిటీలో ఫిజియోథెరపీ, ఇతర క్రీడా సంబంధిత కోర్సులు ప్రవేశపెడతామన్నారు. కోచ్‌లకు అంతర్జాతీయస్థాయి శిక్షణ ఇప్పించాల్సి ఉందన్నారు. రానున్న మూడేళ్లలో మనం సాధించాల్సిన లక్ష్యాలపై బోర్డు తగిన కార్యాచరణ రూపొందించాలని సీఎం సూచించారు.