న్యూఢిల్లీ: నాలుగో రోజు పార్లమెంట్ సమావేశాలు(Parliament Monsoon Session) ప్రారంభం అయ్యాయి. పార్లమెంట్ ప్రాంగణంలో విపక్ష ఎంపీలు ఆందోళనకు దిగారు. ప్లకార్డులతో ఎంపీలు నిరసన తెలుపుతున్నారు. బీహార్ ఓటర్ల జాబితా ప్రత్యేక సమగ్ర సవరణ అంశంపై విపక్ష ఎంపీలు పట్టుబట్టారు. సభ సజావుగా సాగేందుకు సభ్యులు సహకరించాలని స్పీకర్ ఓం బిర్లా విజ్ఞప్తి చేశారు. ప్లకార్డులతో స్పీకర్ పోడియం వద్ద విపక్ష ఎంపీలు నినాదాలు చేశారు. విపక్ష ఎంపీల నినాదాలతో స్పీకర్ సభను(Lok Sabha adjourned) మధ్యాహ్నం 2 గంటల వరకు వాయిదా వేశారు. రాష్ట్రపతి రాజ్యసభకు నామినేట్ చేసిన ప్రముఖ న్యాయవాది ఉజ్వల్ నికమ్, పార్లమెంటు ఎగువ సభ సభ్యుడిగా ప్రమాణ స్వీకారం చేశారు. బీహార్ స్పెషల్ ఇంటెన్సివ్ రివిజన్ కి వ్యతిరేకంగా ప్రతిపక్షాలు చేస్తున్న నిరసనలో కాంగ్రెస్ పార్లమెంటరీ పార్టీ చైర్‌పర్సన్, ఎంపీ సోనియా గాంధీ చేరారు. పార్లమెంటు వెలుపల ఇండియా బ్లాక్ ఎంపీలు నిరసన తెలిపారు. ఎన్నికల సంఘం (Election Commission) నిర్వహిస్తున్న స్పెషల్ ఇంటెన్సివ్ రివిజన్ (Special Intensive Revision) కు వ్యతిరేకంగా ప్రతిపక్ష పార్టీలు గురువారం వరుసగా పార్లమెంటు ఆవరణలో నిరసనలు హోరెత్తాయి.

కాంగ్రెస్ ఎంపీ ఇమ్రాన్ మసూద్(Bihar Congress MP Imran Masood) మాట్లాడుతూ, "మా రాజ్యాంగం మాకు మత స్వేచ్ఛను ఇస్తుంది. ఇది మా మతాన్ని స్వేచ్ఛగా ఆచరించే హక్కును ఇస్తుంది... వారు ఎంత మంది విదేశీయులను గుర్తించారో చెప్పగలరా? దేశాన్ని తప్పుదారి పట్టించే బదులు వారిని జైలులో పెట్టాలి. ఎవరికైనా రెండు ఓటరు ఐడీలు ఉంటే, ఆ వ్యక్తిపై ఎఫ్ఐఆర్ నమోదు చేయాలి... మరి అఖిలేష్ యాదవ్ మసీదు లోపలికి వెళ్లడం ఏమిటి? ఆ మసీదు ఇమామ్ ఒక ఎంపీ కాబట్టి ఆయనతో టీ తాగడానికి అక్కడికి వెళ్లారు. ఇందులో పెద్ద విషయం ఏమిటి?" అని అన్నారు.

పార్లమెంట్ వర్షాకాల సమావేశాలపై కాంగ్రెస్ ఎంపీ కిరణ్ కుమార్ చామల(Congress MP Kiran Kumar Chamala) మాట్లాడుతూ, "మాకు సభలో మాట్లాడే అవకాశం రాలేదు, ప్రతిపక్ష పార్టీలు, నాయకుడు స్పెషల్ ఇంటెన్సివ్ రివిజన్ పై చర్చ కోసం అడుగుతున్నారు. దేశ ప్రజాస్వామ్యానికి ఇది ఒక ముఖ్యమైన అంశం... మేము పార్లమెంటులోని మకర ద్వారంలో నిరసన తెలుపుతాము... ప్రజాస్వామ్యాన్ని కాపాడటమే మా లక్ష్యం. తెలంగాణ సీఎం రేవంత్ రెడ్డితో సమావేశమైన సందర్భంగా ఆయన మాట్లాడుతూ, కుల గణన సమయంలో తెలంగాణ ఏమి చేసిందో వివరించడానికి మేము అన్ని కాంగ్రెస్ సభ్యులను కలుస్తాము... దేశవ్యాప్తంగా ప్రచారం చేయడానికి, కుల గణన అంటే ఏమిటో ప్రజలకు తెలిసేలా ఈ జనాభా గణనను మేము ఎలా చేశామో పార్లమెంటు సభ్యులందరూ అర్థం చేసుకోవాలని మేము కోరుకుంటున్నాము." అని  ఎంపీ కిరణ్ కుమార్ చామల అన్నారు.