హైదరాబాద్: సంగారెడ్డి జిల్లా పటాన్ చెరు మండలం పాశమైలారంలోని సిగాచీ ఇండస్ట్రీస్ లిమిటెడ్‌లో జరిగిన ప్రమాదంలో 44 మంది మరణించిన విషయం తెలిసిందే. రియాక్టర్ పేలడంతో మంటలు చెలరేగి ఈ ప్రమాదం చోటు చేసుకుంది. ఈ ప్రమాదంలో మరో 13 మంది వివిధ ఆస్పత్రుల్లో చికిత్స పొందుతుండగా.. మరో 8 మంది కార్మికులు ఆచూకీ లభించలేదు. ఈ ఘటనపై బుధవారం అధికారులు కీలక నిర్ణయం తీసుకున్నారు. ఎనిమిది మంది కార్మికుల అదృశ్యంపై మిస్టరీ మరింతగా పెరిగే పరిణామంలో వారి ఆచూకీ లభించడం కష్టమేనని నిర్ణయానికి వచ్చారు.

ఈ పేలుడు ఘటనలో ఎనిమిది మంది (రాహుల్, శివాజీ, వెంకటేష్, విజయ్, అఖిలేష్, జస్టిన్, రవి, ఇర్ఫాన్) పూర్తిగా కాలిపోయి బూడిదైపోయి ఉంటారని అధికారులు అనుమానం వ్యక్తం చేస్తున్నారు. సెంట్రల్ ఫోరెన్సిక్ సైన్స్ లాబొరేటరీ (CFSL)కి పంపిన 100 కంటే ఎక్కువ నమూనాలలో ఏవీ ఎనిమిది మంది బంధువులుగా తేలిన వ్యక్తుల డీఎన్ఏ నివేదికలతో సరిపోలేదని తెలిపారు. వారికి సంబంధించి ఎలాంటి అవశేషాలు దొరకటం లేదన్న అధికారులు ఆ ఎనిమిది మంది కూడా చనిపోయి ఉంటారని, అంత్యక్రియలకు సంబంధించిన కార్యక్రమాలు చేసుకోవాలని బాధిత కుటుంబాలకు సూచించారు.

ఒకవేళ ఆ 8 మందిలో ఎవరిదైనా ఆచూకీ తెలిస్తే సమాచారమిస్తామని బాధిత కుటుంబాలకు అధికారులు తెలిపారు. పాశమైలారం పారిశ్రామిక ప్రాంతంలో ఏర్పాటు చేసిన పునరావాస కేంద్రంలో సంగారెడ్డి అదనపు కలెక్టర్ చంద్రశేఖర్ నేతృత్వంలోని అధికారులు ఆ కుటుంబాలకు కౌన్సెలింగ్ ఇచ్చారు. ఈ ప్రకటనతో దిగ్భ్రాంతి చెందిన బంధువులు, మూసివేత లేకపోవడంపై ఆవేదన వ్యక్తం చేశారు. అయితే, మరణ ధృవీకరణ పత్రాల జారీ ప్రక్రియ మూడు నెలల్లో పూర్తవుతుందని అధికారులు వారికి హామీ ఇచ్చారు. తప్పిపోయిన ఎనిమిది మంది కార్మికుల కుటుంబాలకు ఎక్స్ గ్రేషియా, ఇతర హక్కులు అందేలా చర్యలు తీసుకుంటున్నట్లు అదనపు కలెక్టర్ చంద్రశేఖర్ తెలిపారు.