వాయనాడ్: కొండచరియలు విరిగిపడిన వాయనాడ్‌లో పరిస్థితిని అంచనా వేయడానికి ప్రధాని నరేంద్ర మోడీ పర్యటించనున్నారు. జూలై 30న సంభవించిన ఈ విపత్తులో కనీసం 226 మంది ప్రాణాలు కోల్పోయారు. చాలా మంది తప్పిపోయారు. కేరళను తాకిన అత్యంత ఘోరమైన ప్రకృతి వైపరీత్యాలలో ఇది ఒకటిగా పరిగణించబడుతుంది. కొండచరియలు విరిగిపడిన వాయనాడ్‌లో సహాయక చర్యలు, పునరావాస చర్యలను సమీక్షించేందుకు ప్రధాని మోడీ శనివారం కన్నూర్ విమానాశ్రయానికి చేరుకున్నారు.

విమానాశ్రయంలో ప్రధాని మోదీకి గవర్నర్ ఆరిఫ్ మహమ్మద్ ఖాన్, ముఖ్యమంత్రి పినరయి విజయన్ స్వాగతం పలికారు. వైమానిక దళం హెలికాప్టర్‌లో ప్రధాని వాయనాడ్ చేరుకున్నారు. అదే హెలికాప్టర్‌లో ప్రధానితో పాటు గవర్నర్ ఖాన్, ముఖ్యమంత్రి విజయన్, కేంద్ర పెట్రోలియం శాఖ సహాయ మంత్రి సురేష్ గోపీ ఉన్నారు. వాయనాడ్‌లో కొండచరియలు విరిగిపడిన ప్రాంతాలను ప్రధాని ఏరియల్ సర్వే చేపడతారు. విపత్తు కారణంగా ప్రభావితమైన ప్రదేశాలు, సహాయ శిబిరాలు, ఆసుపత్రులను ప్రధాని సందర్శిస్తారు. కొండచరియలు విరిగిపడిన బాధితులు, ప్రాణాలతో బయటపడిన వారితో ప్రధాని మోడీ మాట్లాడనున్నట్లు సమాచారం.