తిరువనంతపురం: శబరిమల బంగారు(Sabarimala Gold Case) ఆభరణాల అదృశ్యం కేసును దర్యాప్తు చేస్తున్న ప్రత్యేక దర్యాప్తు బృందం (Special Investigation Team) శుక్రవారం శబరిమల ప్రధాన పూజారి (తంత్రి) కండరారు రాజీవరూను(kandararu rajeevaru) అరెస్టు చేసిందని వర్గాలు తెలిపాయి. రాజీవరును ఉదయం ఒక రహస్య ప్రదేశంలో విచారించారని, ఆ తర్వాత మధ్యాహ్నం సిట్ కార్యాలయానికి తరలించారని, అక్కడే ఆయన అరెస్టును నమోదు చేశారని వర్గాలు తెలిపాయి. అధికారుల ప్రకారం, ప్రధాన నిందితుడు ఉన్నికృష్ణన్ పొట్టి, మాజీ ట్రావెన్‌కోర్ దేవస్థానం బోర్డు అధ్యక్షుడు పద్మకుమార్ ఇచ్చిన వాంగ్మూలాల ఆధారంగా ఈ అరెస్టు జరిగింది.

రాజీవరుకు పొట్టితో సన్నిహిత సంబంధాలు ఉన్నాయని, ఆలయంలోని ద్వారపాలకుల పలకలను, శ్రీకోవిల్ (గర్భగుడి) తలుపుల చట్రం పలకలను తిరిగి పూత పూయడానికి ఆయనే సిఫార్సు చేశారని సిట్ దర్యాప్తులో తెలింది. తరువాత, ట్రావెన్‌కోర్ దేవస్థానం బోర్డు పునఃపూత కోసం ఆయన అనుమతి కోరినప్పుడు, రాజీవరు తన ఆమోదాన్ని తెలియజేశారని అధికారులు తెలిపారు. దర్యాప్తులో భాగంగా రాజీవరును ఇంతకుముందే విచారించినట్లు సిట్ అధికారులు తెలిపారు. బంగారం అదృశ్యమైన ఘటనపై దర్యాప్తు చేయడానికి కేరళ హైకోర్టు ప్రత్యేక దర్యాప్తు బృందాన్ని (ఎస్‌ఐటి) ఏర్పాటు చేసిన తర్వాత, ఈ కేసులో అరెస్ట్ అయిన 11వ వ్యక్తి ఇతనని అధికారులు తెలిపారు.