అబ్దుల్లాపూర్​మెట్ మండల పరిధిలో గంటన్నర పాటు దంచికొట్టిన వాన

అబ్దుల్లాపూర్​మెట్​: హైదరాబాద్​ నగర శివారు ప్రాంతాల్లో గురువారం సాయంత్రం కుండపోత వర్షం కురిసింది. నిమిషాల వ్యవధిలోనే రోడ్లన్నీ జలమయమయ్యాయి. ప్రజలు తీవ్ర ఇబ్బందులకు గురయ్యారు. అబ్దుల్లాపుర్ మెట్ మండల పరిధిలో పెద్ద అంబర్​పేట్​, కుంట్లూరు తట్టిఅన్నారం, బాచారం, తారామతిపేట తదితర ప్రాంతాల్లో భారీగా వర్షం కురిసింది. అబ్దుల్లాపూర్​మెట్​ మండల పరిసరా ప్రాంతాల్లో గంటన్నర పాటు కుండపోత వర్షం కురిసింది. దీంతో హైదరాబాద్​-విజయవాడ జాతీయ రహదారి ట్రాఫిక్​ జామ్​ అయ్యింది. పెద్ద అంబర్​పేట్ మున్సిపాలిటీ పరిధిలో రావినారాయణరెడ్డి కాలనీ ఫేస్​–2లో భూదాన్​లో నిరుపేదలు వేసిన గుడిసెలలోకి వర్షపు నీరు చేరి పూర్తిగా జలమయమయ్యాయి. అలాగే గుంతపల్లి–మజీద్​పూర్​ మధ్య ఉన్న అవంతి కాలేజీ వంతెన వద్ద భారీగా వరద నీరు ప్రవహిస్తుండడంతో రాకపోకలు సాగించే ప్రజలు ఇబ్బందులు పడ్డారు.