సహజ నటన, భావోద్వేగ ప్రదర్శనతో తెలుగు సినీపరిశ్రమలో ప్రత్యేక గుర్తింపు తెచ్చుకున్న నటుడు ఉదయ్‌భాస్కర్. ఆయన మరోసారి ‘సెకండ్ ఇన్నింగ్స్’ చిత్రంతో ప్రేక్షకుల ముందుకు రావడానికి సిద్ధమవుతున్నారు. ఉదయ్ భాస్కర్ ప్రధాన పాత్రలో నటించిన ఈ చిత్రంపై, ముఖ్యంగా ఆయన నటనపై పరిశ్రమలో ఆసక్తి పెరుగుతోంది. సుమారు పదహారేళ్ల నటనా అనుభవం కలిగిన ఉదయ్‌భాస్కర్ పాత్రలోకి పూర్తిగా లీనమయ్యే నటుడిగా పరిశ్రమలో గుర్తింపు పొందారు.

‘రంగస్థలం’ నుంచి ప్రారంభమైన ఆయన ప్రయాణం టెలివిజన్, సినిమాల వరకు విస్తరించి, ప్రతి దశలో తనకంటూ ఒక ప్రత్యేక ముద్ర వేసుకుంది. సహజమైన హావభావాలు, కళ్లతోనే భావాలను పలికించే నటన ఆయన ప్రధాన బలంగా చెప్పుకోవచ్చు. ఉదయ్ భాస్కర్ నటనలో అతి ఆర్భాటం ఉండదు. పాత్ర అవసరమైతే మౌనంతోనే ప్రేక్షకుడిని కట్టిపడేసే శైలి ఆయనది. అదే కారణంగా ఆయన చేసిన పాత్రలు ప్రేక్షకుల మనసుల్లో ఎక్కువ కాలం నిలిచిపోతాయి.

ప్రతి పాత్రను గౌరవంతో, బాధ్యతతో స్వీకరించి, దానికి పూర్తి న్యాయం చేయాలనే తపన ఆయన నటనలో స్పష్టంగా కనిపిస్తుంది. ‘సెకండ్ ఇన్నింగ్స్’లో ఉదయ్ భాస్కర్ ప్రదర్శన గురించి చిత్రబృందం ప్రత్యేకంగా ప్రశంసలు కురిపిస్తోంది. భావోద్వేగాలకు ప్రధాన ప్రాధాన్యం ఉన్న ఈ సినిమాలో ఆయన నటన సినిమాకే ప్రధాన బలంగా నిలుస్తుందని యూనిట్ సభ్యులు చెబుతున్నారు. పరిశ్రమ వర్గాల సమాచారం ప్రకారం..

ఈ చిత్రంలో ఆయన ప్రదర్శన ప్రేక్షకులను గట్టిగా కదిలించే స్థాయిలో ఉంటుందని, ఉదయ్ భాస్కర్ కెరీర్‌లో ఇది ఒక కీలక మైలురాయిగా నిలవవచ్చని అంచనాలు వినిపిస్తున్నాయి. సహనటిగా నక్షత్రతో ఆయన నటించిన సన్నివేశాలు సహజంగా, నిజాయితీగా వచ్చాయని.. ఇద్దరి మధ్య కనిపించే భావోద్వేగ అనుసంధానం ప్రేక్షకులను ఆకట్టుకుంటుందని చిత్రబృందం పేర్కొంది.

నటీనటుల మధ్య కెమిస్ట్రీ, మౌనాల ద్వారా చెప్పిన భావాలు ఈ చిత్రానికి ప్రత్యేక ఆకర్షణగా నిలుస్తాయని తెలుస్తోంది. ఎడిటింగ్, బ్యాక్‌గ్రౌండ్ స్కోర్, సౌండ్ డిజైన్ వంటి సాంకేతిక అంశాలపై ప్రత్యేక శ్రద్ధ పెట్టి, ఉదయ్‌భాస్కర్ నటనను మరింత ప్రభావవంతంగా ప్రేక్షకుల ముందుకు తీసుకువచ్చే ప్రయత్నం జరుగుతోందని చిత్రవర్గాలు వెల్లడించాయి. నటనే జీవితంగా భావించే నటుడిగా ఉదయ్‌భాస్కర్ తన ప్రయాణాన్ని కొనసాగిస్తున్నారు.

వాణిజ్యపరమైన హంగుల కంటే, భావోద్వేగాలకు ప్రాధాన్యం ఇచ్చే పాత్రలను ఎంచుకుంటూ ముందుకు సాగుతున్న ఆయన ఈ సినిమాతో మరోసారి తన నటనా స్థాయిని నిరూపించబోతున్నారని సినీ వర్గాలు విశ్వసిస్తున్నాయి. ఈ చిత్రం విడుదలైన తర్వాత ఉదయ్‌భాస్కర్ నటనపై మరింత చర్చ జరుగుతుందని, ఆయన ప్రదర్శన పరిశ్రమలో కొత్త చర్చలకు దారి తీసే అవకాశముందని అంచనాలు వ్యక్తమవుతున్నాయి. ఈ సినిమా విడుదల తేదీని త్వరలో ప్రకటించనున్నట్లు చిత్రబృందం తెలిపింది.