చదరపు గజం రూ.28,500 కు కొనుగోలు..

సుమారు రూ. 9 కోట్ల ఆదాయం..

నల్లగొండ టౌన్ (విజయక్రాంతి): నల్లగొండ- దేవరకొండ రోడ్ హౌసింగ్ బోర్డు కాలనీలోని హెచ్ ఐజి(HIG), ఎంఐజి(MIG) ప్లాట్లు మంచి ధరతో హాట్ కేకుల్లా అమ్ముడయ్యాయి. మంగళవారం నిర్వహించిన వేలంలో 21 ప్లాట్లు అమ్ముడయ్యాయి. ఈ విక్రయాల ద్వారా హౌసింగ్ బోర్డుకు సుమారు రూ. 8,97,48,600/-(సుమారు 9 కోట్లు), మేర ఆదాయం వచ్చింది. వీటిలో పలు ప్లాట్లను నిర్ణయించిన ఆఫ్ సెట్ ధర కంటే దాదాపు రెట్టింపు ధరతో వేలం పాటలో కొనుగోలు చేశారు.హెచ్ ఐజి, ఎంఐజికి చెందిన 27 ప్లాట్ల విక్రయానికి హౌజింగ్ బోర్డు నోటిఫికేషన్ ఇచ్చింది. ఇందులో  భాగంగా నిర్వహించిన వేలం పాటలో అధిక సంఖ్యలో కొనుగోలుదారులు పాల్గొన్నారు. 

చదరపు గజానికి హెచ్ఐజి ప్లాట్ కు రూ.15 వేలు, ఎంఐజి స్థలానికి రూ.13 వేలుగా ఆఫ్ సెట్ ధరగా నిర్ధారించగా హెచ్ ఐ జి ప్లాట్ ను గరిష్టంగా రూ.28,500 ధరకు కొనుగోలు చేశారు. మరో రెండు హెచ్ ఐజి ప్లాట్ల ను కూడా నిర్ధేశిత ఆఫ్ సెట్ ధర కంటే అధికంగా రూ. 25,500 కు, రూ. 24,000 లకు వేలం పాటలో కొనుగోలు చేశారు. ఎంఐజి ప్లాట్ల విషయంలో 220 చదరపు గజాల ప్లాట్  గరిష్టంగా 23,500 వరకు ధర పలికింది. అన్ని ప్లాట్లకు కూడా కనీస ధర కంటే అధికంగానే చెల్లించి కొనుగోలు చేయడం విశేషం. ఇలా మొత్తం మీద ఈ కాలనిలో 4660 చదరపు గజాల విస్తీర్ణంలోని వివిధ రకాల ప్లాట్లను విక్రయించగా, సగటున ఒక్కో చదరపు గజం స్థలానికి రూ.19,069 ధర పలికింది.