కొన్ని మాటలకు

మౌనం తప్ప సమాధానం ఉండదు

కొందరి మాటలు

కళ్లు చెమ్మగింపజేస్తాయి !

పూల పలుకులు

వాన చినుకుల ఉపశమనాలవుతాయి!

మంత్ర పూల స్పర్శతో

రాళ్ళు దేవుళ్లవుతారు

సత్యభాషణాల లోకం

జెండా జేజేలు అందుకుంటూ 

ఉంటుంది !

గుండె చప్పుల్లతో  మాట్లాడే

తల్లులందరూ వాగ్దేవిలవుతారు

పిల్లలకు స్తన్యాలిచ్చిన అమ్మలవుతారు !

 పూల చూపులు కూడా

 పూల మాటలే !

పూల రూపాలు కూడా

 మూగ మాటలే !

జలాల్లో నేడు పూలు 

మాట్లాడడం లేదు

చమురు మాటలతో

పూల వనాలని దహించివేస్తుంది  జగతి!

పూల బాసల ఎంకి గొంతు 

మూగబోయింది!

పైసా బానిసల ఎగతాళికి !

తెరల తెరల

మంచు కళా దుఃఖాలని

ముఖాల మీద పులుముతున్నారు !

చెమ్మలు నింపే

పూల బాసలకి సలాములు !

గుండెల్లో దమ్ములు నింపే

సత్యవాక్కులకు దండాలు !