హైదరాబాద్: పిల్లలలో అలెర్జీలు, హే ఫీవర్, ఆస్తమా చికిత్సకు సాధారణంగా సూచించే ఆల్మాంట్-కిడ్ సిరప్‌లో(Almont-Kid Syrup) అత్యంత విషపూరితమైన ఇథిలీన్ గ్లైకాల్ (Ethylene glycol) అనే పదార్థం కలిసినట్లు ఆరోపణలు రావడంతో, దాని వాడకాన్ని తక్షణమే నిలిపివేయాలని తెలంగాణ డ్రగ్స్ కంట్రోల్ అడ్మినిస్ట్రేషన్ శనివారం అత్యవసర హెచ్చరిక జారీ చేసింది. 

డిసిఎ జారీ చేసిన ఒక ప్రకటన ప్రకారం, లెవోసెటిరిజైన్ డైహైడ్రోక్లోరైడ్, మోంటెలుకాస్ట్ సోడియం సిరప్ కల్తీకి గురైనట్లు ప్రకటించిన ఒక ప్రయోగశాల నివేదికకు సంబంధించి కోల్‌కతాలోని సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (Central Drugs Standard Control Organization), తూర్పు జోన్ నుండి తమకు ఒక హెచ్చరిక అందింది. ఈ విషయాలను దృష్టిలో ఉంచుకుని, ప్రజలు తమ వద్ద ఈ సిరప్ ఉన్నట్లయితే, దాని వాడకాన్ని తక్షణమే నిలిపివేయాలని, ఆలస్యం చేయకుండా సమీపంలోని డ్రగ్స్ కంట్రోల్ అథారిటీకి(Drugs Control Authority) ఈ విషయాన్ని తెలియజేయాలని డీసీఏ సూచించింది. ప్రజలు సదరు ఉత్పత్తి తమ వద్ద ఉన్నట్లుగా తెలంగాణ డ్రగ్స్ కంట్రోల్ అడ్మినిస్ట్రేషన్‌కు (Telangana Drugs Control Administration) నేరుగా తెలియజేయవచ్చని, ఇందుకోసం తెలంగాణ టోల్-ఫ్రీ నంబర్: 1800-599-6969కు ఫోన్ చేయవచ్చని అది పేర్కొంది.

వాడకూడని సిరప్‌ వివరాలివే..

మందు పేరు: Almont-Kid Syrup

బ్యాచ్‌ నం: AL-24002

తయారీ తేదీ: Jan-2025

గడువు తేదీ: Dec-2026

దీనిపై సమాచారం లేదా ఫిర్యాదుల కోసం టోల్‌ఫ్రీ నంబరు 1800-599-6969లో సంప్రదించాలని సూచించారు.