అమరావతి: తిరుమల తిరుపతి దేవస్థానం(Tirumala Tirupati Devasthanams)లో భక్తుల రద్దీ సాధారణంగా కొనసాగుతోంది. టోకెన్లు లేని భక్తుల శ్రీవారి సర్వదర్శనానికి(Srivari Sarva Darshan) 6 గంటల సమయం పడుతోందని ఆలయ అధికారులు పేర్కొన్నారు. తిరుమల వెంకన్న సర్వదర్శనానికి 4 కంపార్టుమెంట్లలో భక్తులు వేచి ఉన్నారు. నిన్న శ్రీవారిని 80,423 మంది భక్తులు దర్శించుకున్నారు.  29,361 మంది భక్తులు ఆదివారం శ్రీవారికి తల నీలాలు సమర్పించారు. నిన్న శ్రీవారి హుండీ ఆదాయం రూ 3.40 కోట్లు వచ్చినట్లు టీటీడీ అధికారులు నేడు ప్రకటించారు. 

భారతదేశం-పాకిస్తాన్ సరిహద్దు(India Pakistan Ceasefire)లో ఉద్రిక్తత నేపథ్యంలో తిరుమల కొండలపై ఉన్న శ్రీ వెంకటేశ్వర ఆలయంలో ఇప్పటికే అధికారులు భద్రతను కట్టుదిట్టం చేశారు. కొండ ఆలయ వ్యవహారాలను నిర్వహించే పోలీసులు, తిరుమల తిరుపతి దేవస్థానం (TTD) ముందు జాగ్రత్త చర్యగా భద్రతను పెంచారు. తిరుపతి జిల్లా పోలీసు సూపరింటెండెంట్ హర్షవర్ధన్ రాజు జిల్లా అధికారులతో సమావేశం నిర్వహించారు. తిరుమలలో భద్రత కల్పించే బాధ్యత కలిగిన ఎలైట్ యాంటీ టెర్రర్ కమాండో యూనిట్ అయిన ఆర్గనైజేషన్ ఫర్ కౌంటర్ టెర్రరిస్ట్ ఆపరేషన్స్ (ఆక్టోపస్), ఇతర భద్రతా సిబ్బందితో కలిసి ఆలయం చుట్టూ తనిఖీలు నిర్వహిస్తుంది. ఆలయ ప్రాంగణంలో గట్టి నిఘా నిర్వహిస్తున్నట్లు అధికారులు తెలిపారు.