హైదరాబాద్: తెలంగాణ రాష్ట్రంలో కాంగ్రెస్ ప్రభుత్వం ఎంతో ప్రతిష్ఠాత్మకంగా నిర్వహించిన కుల గణనపై కేంద్ర హోంమంత్రి అమిత్ షా ఇటీవల చేసిన వ్యాఖ్యలకు తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు, ఎంఎల్‌సి బి మహేష్ కుమార్ గౌడ్ తప్పుబట్టారు. ఇటీవల కాలంలో అమిత్ షా ఓ ప్రముక ఛానల్ కు ఇచ్చిన ఇంటర్వ్యూలో తెలంగాణ ప్రక్రియను సర్వేగా తోసిపుచ్చారు. బీజేపీ నేతృత్వంలోని కేంద్రం ప్రభుత్వం సరైన జనాభా గణన నిర్వహిస్తోందని చెప్పారు. దీనిపై మహేష్ కుమార్ గౌడ్ తీవ్రంగా స్పందిస్తూ కేంద్ర మంత్రికి జనాభా గణన కార్యకలాపాలకు సంబంధించిన రాజ్యాంగ నిబంధనలపై ప్రాథమిక అవగాహన కూడా లేదని ఆరోపించారు. 

రాజ్యాంగం, జనాభా గణన చట్టం 1948 ప్రకారం.. అధికారిక జనాభా గణనను నిర్వహించడానికి కేంద్ర ప్రభుత్వానికి మాత్రమే చట్టబద్ధంగా అధికారం ఉందని ఆయన ఎత్తి చూపారు. రాష్ట్రాలకు జనాభా గణనను నిర్వహించడానికి రాజ్యాంగ అధికారం లేదని, కాంగ్రెస్ నేతృత్వంలోని తెలంగాణ ప్రభుత్వం సమగ్ర సామాజిక-ఆర్థిక, విద్యా, ఉపాధి, రాజకీయ, కుల ఆధారిత సర్వేను చట్టపరమైన సరిహద్దుల్లోనే పనిచేసిందని మహేశ్ స్పష్టం చేశారు. ఎస్ఈఈఈపీసీ (సామాజిక-ఆర్థిక, విద్య, ఉపాధి, రాజకీయ మరియు కుల సర్వే) అని పిలువబడే తెలంగాణ సర్వే 3.54 కోట్లకు పైగా జనాభాను కవర్ చేసిందని టీపీసీసీ చీఫ్ పేర్కొన్నారు. 

ఇంత విస్తృతి డేటా సేకరించామని, ఇంకా ఏమి తెలుసుకోవాలి..? అని ప్రశ్నించారు. తెలంగాణ సాధించిన ఘనతను అమిత్ షా స్పష్టంగా అర్థం చేసుకోలేదని ఆయన ఆగ్రహం వ్యక్తం చేశారు. బీజేపీ ప్రభుత్వం స్వయంగా కుల గణనను ప్రారంభించిందన్న షా వాదనను మహేష్ కుమార్ గౌడ్ కూడా తిప్పికొట్టారు. భారత్ జోడో యాత్ర సందర్భంగా రాహుల్ గాంధీ నిరంతరం డిమాండ్ చేయడం వల్లే కేంద్రం స్పందించాల్సి వచ్చిందన్నారు. రాహుల్ గాంధీ కుల గణన కోసం గట్టిగా వాదిస్తున్నప్పుడు జేపీ నడ్డా, రాజ్‌నాథ్ సింగ్ ఎక్కడ ఉన్నారు..?, అప్పుడు వారు దానికి ఎందుకు మద్దతు ఇవ్వలేదు..? అని ప్రశ్నించారు.

బీజేపీ కేవలం కసరత్తును ప్రారంభించడమే కాకుండా తెలంగాణలోని కాంగ్రెస్ ప్రభుత్వం సేకరించిన డేటాతోనే జనభా గణనను ప్రారంభించిందని ఆయన చెప్పారు. స్థానిక సంస్థల ఎన్నికల్లో వెనుకబడిన తరగతులకు 42% రిజర్వేషన్లను రాష్ట్రం ప్రకటించిందని, తెలంగాణ అసెంబ్లీ ఆమోదించిన బీసీ కోటాను 42%కి పెంచే శాసన బిల్లులను అమిత్ షా, కేంద్ర ప్రభుత్వం వెంటనే ఆమోదించాలని గౌడ్ డిమాండ్ చేశారు. కేంద్రానికి సామాజిక న్యాయం పట్ల చిత్తశుద్ధి ఉంటే, రాజ్యాంగంలోని తొమ్మిదవ షెడ్యూల్‌లో ఉన్న చట్టాలను జోడించి తెలంగాణ సాధించిన దానికి మద్దతు ఇవ్వాలని మహేశ్ కుమార్ గౌడ్ పేర్కొన్నారు.