అశ్వాపురం (విజయక్రాంతి): మొండికుంట గ్రామంలో వినాయక పంచరాత్రుల వేడుకలు అత్యంత ఘనంగా జరిగాయి. ఈ ఐదు రోజుల పండుగలో ప్రతిరోజూ ప్రత్యేక పూజలు, హోమాలు, సాంస్కృతిక కార్యక్రమాలతో భక్తి వాతావరణం వెల్లివిరిసింది. ఉత్సవాల తొలిరోజున విఘ్నేశ్వరుడి విగ్రహ ప్రతిష్టాపనను మంత్రోచ్ఛారణల మధ్య వైభవంగా నిర్వహించారు. స్థానిక పండితులు వినాయకుడికి ప్రత్యేక పూజలు చేసి ఉత్సవాలకు నాంది పలికారు. రెండవ రోజు నుంచి ఐదవ రోజు వరకు లలిత సహస్రనామ పఠనం, హారతులు, అన్నదానం వంటి కార్యక్రమాలు నిరంతరాయంగా కొనసాగాయి. సాయంత్రం వేళల్లో చిన్నారులు చేసిన వినాయక నృత్య ప్రదర్శనలు భక్తులను విశేషంగా ఆకట్టుకున్నాయి. 

శోభాయాత్రలో భక్తుల జయజయధ్వానాలు ఉత్సవాల చివరి రోజైన సోమవారం నాడు పెద్ద ఎత్తున శోభాయాత్ర నిర్వహించారు. మేళతాళాలు, జయజయధ్వానాలతో ఊరంతా వినాయకుడిని ఊరేగిస్తున్నప్పుడు, భక్తులు పాలపుంతలా తరలివచ్చారు. మహిళలు రంగురంగుల దుస్తుల్లో, పురుషులు సంప్రదాయ వేషధారణలో పాల్గొని ఉత్సవానికి మరింత శోభను తెచ్చారు. తుమ్మలచెరువు రోడ్డు స్థానిక కమిటీ ఆధ్వర్యంలో ఏర్పాటు చేసిన అన్నదానం కార్యక్రమంలో వందలాది మంది భోజనం చేశారు. వినాయక పంచరాత్రులు కేవలం ఒక పండుగ మాత్రమే కాదు, సమాజంలో ఐక్యతను, సాంస్కృతిక విలువలను, భక్తి భావాలను పెంపొందించే వేదికగా నిలిచాయని ఉత్సవ కమిటీ సభ్యులు తెలిపారు. ఈ వేడుకలు గ్రామంలో సామూహిక ఉత్సాహాన్ని, ఆధ్యాత్మికతను నింపాయి.